Treinu Subar, Polísia Detein Membru GAM Na’in-Neen

Hatutan.com, (28 Outubru 2024), Díli-Polísia Munisípiu Díli liuhosi Eskuadra Dom Aleixo, detein suspeitu na’in-neen (6 nu’udár membru Grupu Arte-Marsiál (GAM) ida ne’ebé pratika atividade treinu subar iha área Hudi-laran, Díli.

Lee Mós: CFP Sei Foti Medida Hasoru Funsionáriu Públiku Sira Ne’ebé Envolve GAM-GAR

Komandu PNTL Munisípiu Dili, Superintendente Xefe Polísia Orlando Gomes, informa, iha Domingu (27/10/2024), haleu tuku 20:40 Otl, Komandu Díli simu informasaun hosi komunidade sira, informa katak, iha sidadaun balu ne’ebé mak uza atributu artes-marsiál, treinu ‘subar’ iha área Hudi-laran ne’ebé lokaliza besik Embaixada Austrália nia oin.

Sidadaun na’in-neen ne’ebé polísia detein tanba partika atividade treinu subar GAM iha área Hudi-laran, Díli. Foto/Tome da Silva

“Agora dadauk, ami detein na’in-neen (6) bá oras 72 hodi halo prosesu no aprezenta bá iha Ministériu públiku,”  Superintendente Xefe Polísia Orlando Gomes, informa bá Jornalista sira iha Komandu Munisípiu Dili, Comoro, Segunda (28/10/2024).

Nia esklarese katak, razaun Polísia halo kapturasaun bá sidade na’in-neen ne’e, tanba Rezolusaun Governu Númeru 45/2023, ne’ebé koalia kona-bá suspensaun bá atividades arte-marsiál, arte-rituál, bandu ka la autoriza atu GAM Persaudaraan Setia Hati Terate (PSHT), IKS-PTL (Ikatan Kera Sakti, Putra Timor-Leste), KORK (Kmanek Oan Rai Klaran) no GAR Sete-Sete (77) hala’o atividade treinu.

Baze bá rezolusaun governu nian iha leten, maka PNTL ne’ebé mak sai hanesan Ajénte Seguransa Estadu nian, tenke impoin lei no regulamentu sira ne’ebé governu fó sai.

Komandu PNTL Munisípiu Díli mós sei halo nafatin operasaun bá fatin sira hotu iha Díli laran, sidadaun sé de’it mak viola rezolusaun ida ne’e, Polísia tenke halo kapturasaun, tanba sidadaun hothotu tenke kumpri lei, no rezolusaun sira ne’ebé mak governu hasai.

Jornalista: Rogério Pereira Cárceres