Janeiru-Outubru, Família 3.213 Afeitadu bá Dezastre Naturál

Hatutan.com, (04 Novembru 2024), Díli— Hahú hosi fulan Janeiru to’o Outubru tinan ne’e, Autoridade Protesaun Sivil (APC, sigla portugés) rejista família 3.213 mak afeitadu bá dezastre naturál.

Uma ida hetan estragu hosi udan no anin-boot, foin lalais ne’e. Foto/APC

Diretór Gabinete Relasaun Externa no Komunikasaun Cesário da Silva Marquez fó sai dadus ne’e iha edifísiu APC, Caicoli, segunda (04/11/2024).

Lee Mós: Relatóriu APC: Ema Na’in-rua Lakon Vida no Uma 28 Hetan Estragu Kauza Husi Dezastre Naturál

Tipu dezastre ne’ebé APC rejista mak hanesan rai halai, anin bo’ot sobu uma, inséndiu, ai tohar no kauza dezastre naturál sira seluk hanesan Bee Sae no seluk-seluk tan.

“Hosi númeru 3213 ne’e, iha família 3.199 mak hetan ona apoiu emerjénsia no sira ne’ebé seidauk simu na’in 20,” nia hateten.

Família 20 ne’ebé to’o agora seidauk simu apoiu emerjénsia hosi APC tanba kestaun infraestrutura, asesibilidade dalan bá família vítima sira susar, kestaun seluk maka rekursu umanu, limitasaun funsionáriu APC ne’ebé seidauk bá to’o iha Postu-Administrativu sira, suku no aldeia sira tanba ne’e informasaun to’o tarde no ekipa apoiu más tarde.

Emerjénsia ne’e tuir Lei ohin akontese apóiu emerjénsia ne’e to’o kedan, tamba ne’e ba vítima sira ne’ebé seidauk hetan nafatin iha direitu tuir lei hateten ona.

Hosi dadus ne’ebé rejistadu, ekipa APC kontinua halo verifikasaun no reverifikasaun atu bele kontinua bá iha apoiu rekoperasaun nian, tanba iha apoiu rekoperasaun iha item 22 no presiza iha duni verifikasaun atu hetan validasaun molok fó apoiu rekoperasaun nian.

Inísiu Novembru, Rejista Afeitadu 19

Diretór Gabinete Relasaun Externa no Komunikasaun SEPC, Cesário da Silva Marquez informa mos katak, hahu hosi loron 28 Outubru to’o 04 Novembru 2024, iha rejiaun Timor-Leste normal no akontese tipu dezastre ne’ebé Sentru Nasionál Operasaun Protesaun Sivil-Autoridade Protesaun Sivil (CNOPC-APC, sigla portugés) rejista hamutuk 19, ho tipu anin sobu 14 no ahi han 5.

Numeru ema afetadu hamutuk 74, Prienxe Kriteria 18, Apoiu Emerjensia 1, Numeru Ema Evakua 13.

Akontese dezastre sira ne’e iha Munisipiu Covalima, ahi han uma 3, municipiu Lautem anin sobu uma 1, munisipiu Liquiça anin sobu uma 13 no munisipiu Viqueque anin sobu uma 2.

Família vítima sira ne’ebé APC halo atuasaun la’os kategoria ba vítima todan ka bo’ot tamba ne’e evakua de’it ba família viziñu sira no fo apóiu emerjénsia direitamente hodi hein rekopera sira ba hikas hela fatin.

Komando APC munisipiu ho parseiru relevante fornese asistensia emerjensia ba familia afetadu sira mak hanesan ai-han no la’os ai-han (food item & Non-food Item).

Komandu Operasional Autoridade Protesaun Sivil (APC) munisipiu sira sei kontinua halo hela levantamentu detallu kona-ba sasan ne’ebé estragus no lakon.

Tuir dekretu-lei nú. 7/2021, iha artigu 10 ne’ebé koalia kona-ba klasifikasaun Danu ka estragus ou lakon, iha mos despaixu ministerial ida ho Nú. 282/SEPC/MI/VI/2020 katak atu iha apoiu rekoperasaun sira presija halo uluk lai verifikasaun katak Prienxe dunik kriteria ga lae, ou merese atu hetan dunik tuir guiaun ne’ebé iha ga lae maibé ba emerjénsia nian ekipa APC sei atribui direita bainhira simu informasaun katak iha dezastre ne’ebé afeita direita ba komunidade sira.

Jornalista: Vito Salvadór