Dezentendimentu iha MOP Viral, Ministru Samuel Marçal Afirma Asesór Laiha Kompeténsia Hasai Funsionáriu Públiku

Hatutan.com, (06 Novembru 2024), Díli—Dezentendimentu entre asesór ida ho funsionária publika ida iha Ministériu Obras Públiku (MOP), daudaun ne’e, sai viral iha média Sosiál Facebook.

Dezentendimentu iha MOP entre asesór ida ho funsionaria públika ida ne’ebé viral iha Facebook. Foto/Repro

Ema ua’in partilla iha sira ida-idak nia konta Facebook privadu no balun fali partilla iha konta Facebook grupu nian hodi fó opiniaun kontra maka’as asesór ne’e nia afirmasaun ho arrogánsia uitoan ameasa atu hasai ka demite tiha funsionária públiku ida-ne’e.  

Liga ho afirmasaun asesór ne’e nian,  Ministru Obras Públiku, Samuel Marçal hateten asesór ida laiha liu direitu atu hasai ka demite funsionáriu públiku ida iha instituisaun estadu nian.

Ministru Samuel Marçal bá Hatutan.com iha PN, Kuarta (06/11/2024),  subliña  atu hapara funsionariu ne’e kompeténsia Komisaun Funsaun Públika (CFP, sigla portugés).

“Ha’u hanesan ministru laiha direitu atu hapara ka hasai  funsionáriu públiku ida, sa-tán asesór ida. Ha’u mak laiha  kompetensia ona,  asesór tan ne’e, la loos,” Ministru Samuel Marçal tenik.

Video dezentendimentu asesór ida ho funsionária públiku ida iha MOP ho durasaun minutu 4 liu uitoan, ema ua’in iha Facebook fó komentáriu ne’ebé kontra maka’as asesór nia  afirmasaun atu hasai funsionáriu publika ne’e.

Iha balun mós lekar iha Facebook kona-bá pasadu asesór nian liga ho pro-autonomia no pro-indesénsia ne’ebé asesór ne’e afilia bá iha tinan 1999 durante hala’o estudu iha Jogjakarta-Indonézia.   

Jornalista : Leopoldina de Carvalho