Nasionál
Dezintendimentu iha MOP Tanba FP Na’in-Haat Lakohi Muda no La Entrega Xave
Hatutan.com, (08 Novembru 2024), Dili—Assesór rekursu umanu iha Ministériu Obras Públika (MOP), Tomas Magno do Carmo hateten, assesór laiha direitu atu hasai Funsionáriu Públiku (FP) ida hosi instituisaun Estadu nian.
Assesór rekursu umanu iha Ministériu Obras Públika (MOP), Tomas Magno do Carmo. Foto: Leopoldina de Carvalho.
Tomas Magno do Carmo hato’o asuntu ne’e liga ho problema dezintedimentu entre assesór no funsionáriu públiku ne’ebé virál iha plataforma média sosiál ne’ebé deskonfia iha assesór balun ameasa atu hasai funsionáriu públiku balun, foin lalais ne’e.
Nia klarifika katak, dezintendimentu ne’e la’ós tanba atu hasai funsionáriu públiku sira hosi departementu laboratóriu maibé tanba funsionáriu ne’ebé virál lakohi koopera atu muda bá diresaun seluk.
Nia haktuir, iha duni desizaun atu muda funsionáriu na’in-haat hosi departementu laboratóriu no ne’e la’ós desizaun ministru ho assesór nian, maibé bazeia bá karta despaixu númeru 13911/2024/PCF, loron 24 setembru 2024 mai hosi Komisaun Funsaun Públika (KFP).
“Provas dehan katak, la’ós ami mak hapara funsionáriu ida-ne’e maibé nia hetan karta mai hosi Komisaun Funsaun Públika mak husu atu muda. Funsionáriu permanente na’in mak Funsaun Públika. Muda sira na’in haat bá Diresaun Jeral Habitasaun Urbanismu, la hasai funsionáriu,” Tomas Magno do Carmo hateten bá Hatutan.com, iha MOP, Caicoli, sesta (08/11/2024).
Nia rekoñese katak hanesan assesór laiha kompeténsia atu hasai funsionáriu públiku tanba assesór nia servisu maka halo paresre, prodús relatóriu, dezevolve no kria servisu ida ne’ebé di’ak iha ministériu laran.
“Habadak dehan de’it assesór laiha direitu atu hapara ka muda funsionáriu ida. Ministru dehan ona katak ministru de’it la hapara funsionáriu permanente sa tán ha’u. Assesór nia servisu tuir orientasaun ministru nian,” nia esplika.
Tuir nia, iha duni razaun balun atu muda funsionáriu na’in-haat hosi departementu laboratóriu bá fali Diresaun Jerál Habitasaun Urbanizmu tanba tuir rezultadu peskiza iha relatóriu ne’ebé iha katak, funsionáriu iha diresaun ne’e mai hosi família ida de’it kompostu hosi aman, oan, tian no subriña ne’ebé kontra Lei Funsaun Públika.
“Maibé bainhira simu karta despaixu hosi KFP, funsionáriu na’in-haat ne’e lakohi koopera ho desizaun tanba razaun dehan fatin laiha,” nia hateten tán.
Nia hatutan, dezintendimentu ne’ebé mosu to’o virál iha média sosiál la’ós ho assesór Tomas Magno maibé antes ne’e mosu entre funsionáriu ho funsionáriu, tanba funsionáriu na’in-haat ne’ebé hetan karta despaixu atu muda bá DGHU lakohi entrega xave odamatan, inklui lakohi entrega komputadór ne’ebé antes ne’e sira uza ba halo servisu.
Kona-bá asaun lakohi entrega patrimóniu hirak ne’e Tomas Magno do Carmo dehan, ne’e parte kompetente hosi diresaun disiplinár mak sei foti desizaun no halo investigasaun.
Jornalista: Leopoldina de Carvalho