Ramos-Horta Halo Lansamentu bá Espozisaun “Sci-Tech EXPO 2024”

Hatutan.com, (15 Novembru 2024), Díli- Prezidente Repúblika (PR), José Ramos-Horta, Sesta (15/11/2024),  halo lansamentu ba Espozisaun “Sci-Tech EXPO 2024” iha Palásiu Prezididente Nicolau Lobato, hodi motiva foin-sa’e no estudante sira atu estuda makas iha sénsia no teknolojia hodi halo deskobrimentu foun sira ne’ebé kontribui liután ba dezenvolvimentu sustentavel iha Timor-Leste.

Lee Mós: Ramos-Horta Inaugura EBF Kamlai Ne’ebé Konstrui Hosi Austrália

Diretór Ezekutivu TIC Timor halo aprezentasaun kona-ba Siénsia Teknolojia iha espozisaun “Sci-Tech EXPO 2024” ne’ebé hala’o iha Palásiu Prezidensiál, Sesta (15/11/2024). Foto/Elio dos Santos da Costa

“Ho orgullu no kontente loke espozisaun ida ne’e atu ho expo ida ne’e bele fó kbiit ba joven sira, akadémiku sira para bele konsentra estuda liu ba siénsia teknolojia,” Prezidente Repúblika José Ramos-Horta hateten.

Xefe Estadu hatutan Timoroan balun halo ona atividade barak iha rai-laran no mós iha rai-li’ur, Timoroan balun iha Brazil asume responsabilidade hanesan xefe departamentu ba investigasaun sientífika, balun halo hela estudu post doutoramentu iha Estadus Unidus Amérika no halo ona konferénsia akadémiku no sientífika barak, sei iha Timoroan barak iha, Eropa, Inglaterra no fatin seluk tan ne’ebé halo estudu Doutoramentu iklui iha Japaun mos.

Ramos-Horta haktuir mós katak iha fulan ruma liubá ka tinan ida ba kotuk, iha espozisaun ida iha Jakarta kona-bá Siénsia no Teknolojia Timoroan sira partisipa no halo aprezentasaun no ema iha Indonézia interese loos atu haree.

“Dala ida tan ha’u hateten katak espozisaun ida-ne’e ita atu fó de’it intensivu ba hotu-hotu, ba joven sira, atu lalika estuda mak Siénsia polítika, Siénsia sosiál no Timoroan barak liu hakarak estuda mak Teolojia, Filozofia no Relasaun internasionál. Ha’u hateten di’ak liu ba estuda mak Siénsia Teknolojia, buka halo deskobrimentu foun kona-ba enerjia foun, kona-ba bee moos, oinsá bele iha bee-moos natoon ba umanidade,” Ramos-Horta hateten.

Ramos-Horta subliña liután katak ba oin estudante no foin-sa’e sira atu halo estudu kle’an liután kona-ba kona-bá dijitalizasaun, Intelijénsia artifisial, estuda kona-ba moras ba animál, moras ba ai-horis no liu-liu estuda kona-ba moras ba Kafe, hodi hadi’a kualidade produsaun kafe iha Timor.

Espozisaun “Sci-Tech EXPO 2024” ne’e organiza husi Ministériu Ensinu Superiór no no halibur matenek na’in hamutuk 36, husi instituisaun ensinu superiór, ajénsia internasionál, kompañia telekomunikasaun, no empreza teknolojia prinsipál sira. Espozisaun loron rua ne’e hatudu programa ida ne’ebé komprensivu inklui espozisaun siénsia no teknolojia, feira ensinu superiór, kompetisaun estudante, no atividade kulturál sira.

Iha mós aprezentasaun husi instituisaun estadu sira liga ho Siénsia no Teknolojia atu bele hakbiit partisipante sira nia koñesimentu hodi motiva foin-sa’e no estudante sira atu bele iha koñesimentu kona-ba Siénsia no Teknolojia.

Jornalista: Vito Salvadór