Xanana Garante Ramos-Horta Promulga OJE 2025 Billaun $2,6 iha Semana Oin

Hatutan.com, (21 Novembru 2024), Díli- Primeiru-Ministru Kay Rala Xanana Gusmão garante katak semana oin Prezidente Repúblika (PR), José Ramos-Horta promulga  Orsamentu Jerál Estadu 2025 ho montante billaun $2,6.

Lee Mós: OJE 2025 Billaun $2,6 Aprova iha Finál Global, FRETILIN-PLP Vota Kontra

Ramos-Horta, Xanana Gusmão, Francisco Kalbuadi Lay ho kuadru partidu CNRT nian halo konferensia imprensa hafoin eleitu bá Prezidente Repúblika 2022-2027. Foto/Dok. Hatutan.com

Primeiru-Ministru Kay Rala Xanana Gusmão hato’o deklarasaun ne’e hafoin halo enkontru semanál ho Prezidente Repúblika José Ramos-Horta, iha Palásiu Prezidensiál, Kinta (21/11/2024).

“Ha’u mai informa de’it ba Prezidente Repúblika katak Orsamentu Jerál Estadu 2025 liu tiha ona, karik la’ós, ohin, la’ós aban karik, dala ruma semana mai ne’e Prezidente Repúblika bele promulga ona,” Primeiru-Ministru Kay Rala Xanana Gusmão informa.

Xefe Governu hatutan atu lori nasaun ne’e ba oin la’ós fasil, difisil mais dehan ona ba Prezidente Repúblika, no temi tiha ona iha Parlamentu Nasionál katak 2025 ne’e governu sei esforsu an atu halo buat barak atu tuir orsamentu ne’ebé fó ona mas halo ho kualidade.

“La’ós dehan halo de’it, halo de’it, ha’u mós promete ona iha Parlamentu Nasionál katak ha’u sei la’o hale’u Timor kada fulan tolu tanba ha’u hatene kada ministériu ida atu halo saida iha ne’e, ne’ebá ba haree tuir hodi bolu atensaun ba malu hanesan ne’e mós ha’u husu ba Parlamentu Nasionál katak sira halo fiskalizasaun bei-beik, karik mak sira haree buat seidauk halo bolu ami ba responde, karik mak halo la di’ak, bolu ami atu responde ita atu korrije,” Xanana Gusmão subliña.

PN Aprova Redasaun Finál OJE 2025

Parlamentu Nasionál liuhosi Komisaun C ne’ebé trata asuntu Finansa Públika, Kinta ne’e mós aprova ona redasaun final OJE 2025 ho montante Billaun $2,6 nune’e entrega bá Prezidente Repúblika Jose Ramos Horta  atu promulga.

Prezidente Komisaun C PN, Cedelizia Faria dos Santos hateten komisaun C hamutuk ho Ministériu Finansa ne’ebé mak marka prezensa hosi Vise-Ministra Finansa, hamutuk ho membru komisaun C ne’ebé partisipa husi Deputadu na’in-lima (5) maiória husi Bankada Governu, Bankada opozisaun la marka prezensa, nune’e  aprova ona redasaun final bá OJE 2025.

“Iha redasaun final ita-boot sira hatene katák proposta kuaze 73 mak Deputadu sira submete mai plenária bainhira halo diskusaun Orsamentu Jerál Estadu (OJE) 2025 iha espesialidade, maibé só uniku proposta 71   de’it mak pasa,” Deputada Cedelizia Faria dos Santos informa  ba Jornalista sira iha PN.

Iha proposta ne’e hasai osan husi millaun $1 dotasaun todo Governu ne’ebé mak tau iha g7+ nia totál inísiu millaun $3 hasai tiha  millaun $1 tau fila-fali $750,000 bá iha F-FDTL no $250,000 tau iha Ministériu Edukasaun maibé nia mantein hela dotasaun todo Governu.

Xefe Bankada PLP, Deputada Maria Angelina Sarmento hateten  iha debate Bankada  opozisaun la konkorda ho OJE 2025 ne’ebé levantamentu husi fundu petrolíferu boot tebes billaun $2,6 ne’ebé primeira vez iha istória.

“Ita hotu preokupa kona-bá presipisiu fiskál no kreximentu ekonomia ne’ebé mak laiha mudansa  preokupa kona-bá setór produtivu ne’ebé seidauk fó serteza bá reseita alternativa. Nune’e mak ami iha  debate OJE ami vota kontra ho pozisaun ida-ne’e mak halo ami la konkorda atu kontribui bá redasaun final iha OJE 2025,” Duputada Maria Angelina Sarmento  hateten.

Jornalista: Vito Salvadór/ Zita Menezes