Boluda Timor Komemora Proklamasaun Independénsia ho Limpeza iha Tasi-ibun

Hatutan com, (29 Novembru 2024), Dilí—Kompañia Boluda Timor komemora loron Proklamasaun Unilaterál Indepedénsia bá dala-49 (28 Novembru 1975-28 Novembru 2024) liu-hosi limpeza iha Tasi-ibun Praia dos Coqueiros hodi asegura tasi moos hosi lixu plástiku.

Funsionariu sira hosi Kompañia Boluda Timor komemora loron Proklamasaun Unilaterál indepedénsia bá dala-49 (28 Novembru 1975-28 Novembru 2024) liu-hosi limpeza iha Tasi-ibun Praia dos Coqueiros, hodi asegura tasi moos hosi lixu plástiku, kinta (28/11/2024). Foto: Zita Menezes.

Asaun limpeza ne’e hala’o iha kinta loron 28 Novembru 2024, liu hosi mobilizasaun funsionáriu hosi kompañia ne’e ho voluntariamente.

Lee Mós: 28 Novembru iha Oé-Cusse, Horta Rekoñese Xanana Lider Vizionáriu no Husu Timoroan Hotu Haluha Pasadu

Team Leader kompañia Boluda Timor, Arnaldo Walter Nogueira hateten, asaun ida ida-ne’e hanesan prezente ida rai doben Timor-Leste (TL) ne’ebé komemora ninia loron istóriku ida-ne’e.

“Bá oin kompañia Boluda Timor sei kontinua atividade limpeza, nune’e bele asegura tasi moos,” Arnaldo Walter Nogueira promete.

Mensajen bá komemorasaun loron 28 Novembru katak, hakarak nafatin garante pás no estabilidade iha  rai  laran nune’e dezenvolvimentu ne’e bele la’o bá oin.

Nune’e mós Captain no manajer Boluda Timor, Jean Michel Toupin hato’o parabens bá povu Timor-Leste tomak ne’ebé komemora loron Proklamsaun Indepedénsia bá dala 49.

“Husu atu ema hotu-hotu kuidadu ambiente tasi nian hosi foer no lixu plástiku nune’e tasi sai hanesan fatin fresku bá ema hotu-hotu,” nia apela.

Kompañia Boluda Timor mai hosi nasaun França iha tinan 2022 to’o ohin loron no hala’o servisu hala’o atendimentu bá ró ne’ebé tama mai iha Portu Tibar.

Jornalista Estajiária: Zita Menezes