Tempu Udan, PN Husu Aselera Projetu Reabilitasaun Valeta, Estrada no Ponte sira

Hatutan com, (03  Dezembru  2024), Díli–Reprezentante povu iha Parlamentu Nasionál husu ba Ministériu Obras Publika (MOP) atu fó hatene ba empreza kontraktor sira ne’ebé ezekuta hela obra reabilitasaun estrada, valete no ponte sira atu aselera tanba tempu udan ona.

Lee Mós: Governu Indika BTK Hadi’a Trotoár Naksobu iha Área Bebora

Kompañia kontraktor halo hela moru protesuan iha mota ulun Kasnafar, Díli. Foto/Tome da Silva

Bainhira projetu reabilitasaun estrada, valeta no ponte sira ne’e la’o neineik hanesan agora, Deputadu sira haree katak bele lori impaktu ba komunidade sira nia hela fatin tanba bele provoka inundasaun atu hanesan 4 fulan-Abríl 2021.

Membru PN hosi Bankada CNRT, José Virgilio Ferreira husu bá Ministériu Obras Públiku  (MOP) atu bele haree projetu estrada, ponte no valeta  tanba agora daudaun tempu udan, maibé projetu  sira ne’e maiória la’o neineik liu.

“Iha Díli laran ita haree katák tempu udan ona, agora ita haree mota-boot sira hanesan iha mota ulun Becora, mota ulun Comoro, mota ulun Maleuana, kompñia  sira ne’ebé halo servisu moru protesaun, estrada no ponte sira la’o neineik loos. Ida-ne’e  bele lori risku ba komunidade tanba udan-boot oras rua ka tolu nia laran bele hamosu inundasaun,” Deputadu José Virgílio Ferreira hateten  iha nia intervensaun plenária PN, Tersa (03/12/2024).

Observasaun ne’ebé Deputadu José Virgílio Ferreira  iha mak reabilitasaun moru protesaun iha Mota Maloa nian tuun ba Bebora la’o neineik.

Seluk fali mak Deputadu Marcos Xavier hosi Bankada CNRT mós hato’o nian preokupasaun  kona-bá estrada iha parte Tibar ne’ebé ligá bá Munisipíu Ermera  prejudika tebes bá movimentu ambulansia no populasaun sira ne’ebé mak halo viajen bá Ermera-Díli.

Membru PN hosi Bankada FRETILIN, José da Crúz hato’o  mós nia preokupasaun kona-bá estrada urbana iha  Maliana, tanba iha tempu udan kompañia sira ne’ebé mak halo ateru bá estrada sira ne’e la apropriadu

“Envez material ne’e para bele kondisiona estrada ho kualidade di’ak, maibé ikus liu udan sai fali tahu hanoin ida-ne’e ita problema iha supervizaun iha terreñu hanoin Vise-Ministru bele koloká informasaun ne’e bá Ministru MOP, Samuel Marçal  para haree didiak tanba Governu tau osan barak, maibé nia kualidade hanesan ne’e ita lamenta tebes,” Deputadu José da Crúz kestiona.

Iha fatin hanesan Vise-Ministru Asuntu Parlamentál, Adérito Hugo da Costa hateten nia parte sei hato’o asuntu  estrada nia  bá Ministériu Obras Públiku (MOP) nune’e bele fó solusaun.

Jornalista Estajiária : Zita Menezes