PM Xanana Orienta Embaixadór Cepeda Fó Atensaun bá Servisu sira ASEAN iha Tailándia

Hatutan.com, (04 Dezembru 2024), Díli-Primeiru-Ministru, Kay Rala Xanana Gusmão, husu bá embaixadór foun Timor-Leste (TL) bá Reinu Tailándia, Francisco Tilman Cepeda, fó atensaun maka’as bá servisu sira hkona-bá Organizasaun Rejionál Association of Southeast Asian Nations (ASEAN) tanba Timor-Leste iha hela prosesu adezaun.

Lee Mós: Malázia Apoiu Timor-Leste Tama ASEAN iha 2025

Embaixadór foun Timor-Leste (TL) bá Reinu Tailándia, Francisco Tilman Cepeda, hasoru malu ho PM Xanana iha Palásiu Governu, Kuarta (04/12/2024). Foto/Espesiál

Xefe Governu Timor-Leste fó nia orientasaun  ida-ne’e durante sorumutu ho Embaixadór Francisco Cepeda iha Palásiu Governu, Díli, molok Francisco Cepeda aranka bá hala’o nia misaun doplomátika iha Tailandia, Sesta, 06 Dezembru 2024.

“Pontu importantantes ne’ebé Primeiru-Ministru kolalia mak ne’e, husu atu Embaixadór fó atensaun uluk bá servisu ASEAN nian tanba ita iha hela prosesu ba adezaun. Buka nafatin oportunidade kona-bá kooperasaun ne’ebé iha atu prepara ita-nia rekursu iha prosesu adezaun ne’e,” Embaixadór Francisco Tilman Cepeda, informa bá jornalista sira, iha Palásiu Governu, Díli, Kuarta (04/12/2024).

Xanana mós husu Embaixadór foun ne’e atu foka bá asuntu ASEAN hodi bele hametin liután Timor-Leste nia kooperasaun bilateral ne’ebé iha entre TL ho Tailândia. Buka explora oportunidade ne’ebé iha hodi lori dezenvolventu mai ita nia rai.

“⁠Ha’u informa Primeiru-Ministru kona-bá hanoin Prezidente Repúblika, José Ramos-Horta nian atu prepara mós vizita bá Tailándia tanba sei iha vizita ofisial hosi Timor-Leste ba Tailándia  atu hametin liutaá ita nia kaloroza relasaun ne’ebé iha ho Tailándia  bele buka mós dalan atu iha vizita hosi parte Tailándia nian mai Timor-Leste,” Francisco Cepeda hateten.

Iha Tersa, 15 fulan-Outubru 2024, Prezidente Repúblika (PR), José Ramos-Horta fó posse bá embaixadór foun Timor-Leste (TL) bá Reinu Tailándia Francisco Tilman Cepeda no Rui Manuel Hanjam bá Uniaun Emiradus Árabe (UEA). Seremónia posse ne’e hala’o iha Palásiu Prezidensiál, Díli.

Jornalista: Rogério Pereira Cárceres