Presiza Investiga Hodi Denunsia Broker iha Diresaun Jerál Servisu Rejistu Notariadu

Hatutan.com, ( 05  Dezembru 2024), Díli–Ministru Justisa ( MJ ), Sergio Hornai, admite atu iha investigasaun profunda ba ezisténsia broker iha Ministériu Justisa, liuliu iha Diresaun Jerál Servisu Rejistu Notariadu (DJSRN).

Lee Mós: PN Preokupa Broker Buras iha Instituisaun Estadu no Husu Kombate Imediata

Ministru Justisa, Sergio Hornai. Foto/Hatutan.com

Liuhosi plenária Parlamentu Nasionál,  Tersa (03/12/2024), Deputadu sira hato’o sira-nia preokupasaun sériu ba lala’ok broker sira ne’ebé  aproveita instituisaun Estadu hanesan iha DJSRN hodi buka lukru ba sira-nia aat fasilita trata abitante sira-nia pasaporte no dokumentu sira seluk tan.

Bá preokupasaun membru PN nian hirak ne’e, Ministru Justisa (MJ), Sergio Hornai  hateten presiza iha investigasaun ba iha broker ne’ebé Deputadu sira iha  PN  preokupa tanba deskonfia aproveita fasilita trata ema nia pasaporte hodi hetan porsentu ka hetan lukru ba sira-nia interese.

“Ita boot sira buka nafatin halo auditoria ka halo investigasaun, jornalizmu investigativu hodi ita bele kaer tiha ema sira ne’e, ita laiha razaun ba ida ne’e, ida ne’e avizu  ha’u sempre hato’o, se ita boot sira hatene bele halo denunsia, atu nune’e, ita bele kaer ema sira ne’e para labele iha tan broker halo mafiozu iha servisu administrasaun  públiku nian” Ministru Sergio Hornai hateten hodi responde jornalista sira hafoin sorumutuk Konsellu Ministru, Kuarta ( 04/12/2024)

Sergio Hornai haktuir katak bainhira identifika ona broker sira ne’e sei prosesa sira tuir lei ne’ebe iha tanba laiha razaun seluk tan, laiha tan dalan seluk tanba lei hateten dehan katak iha fatin reparasaun hotu-hotu atu halo servisu tuir de’it lei.

Prinsipiu komun  Funsaun Administrasaun Públiku atu halo servisu, presta asisténsia ba sidadaun sira nune’e  bele garante funsionamentu bele la’o ho di’ak atu bele fó asisténsia sidadaun sira no atu tulun sidadaun sira para asesu ba administrasaun ida ho lalais no la ho kustu ruma.

Jornalista: Leopoldina de Carvalho