Autoridade Sira Detein Autór Na’in-haat ho Kro’at Ameasa Sidadaun Na’in-tolu iha Beduku no Viral iha SosMed

Hatutan.com, (11 Dezembru 2024), Díli-Forsa konjunta kompostu hosi Polísia Nasional Timor-Leste (PNTL) ho FALINTIL-Forsa Defeza Timor-Leste (F-FDTL),  Kuarta (11/12/2024), kaptura no detein autór na’in-haat ne’ebé uza kro’at (katana) hodi ameasa sidadaun joven na’in-tolu iha área Beduku, no ikus mai sai konsumu públiku ka virál iha sosial média (SosMed) Facebook.

Xefe Departamentu Investigasaun Kriminal Nasional, Superintendente Polísia Joăo Belo dos Reis. Foto/Tome da Silva

Autór na’in-haat ne’e ho insial SL ,SG, BAM, SX, iha ne’ebé kaptura iha Aldea Barlmeta, Suku Tohu-metan, Postu Administrativu Laulara, Munisipiu Aileu.

Xefe Departamentu Investigasaun Kriminál Nasionál, Superintendente Polísia João dos Reis Belo, esplika, prosesu buka tuir autór sira ne’e baze publikasaun video ne’ebé  virál iha media sosial Facebook.

“Ami bele hatete, esforsu hothotu  halo, bá sira ne’ebé mak direta ka indireta envolve iha kazu ne’e isei buka tuir hotu kedas. Ne’e kríme. Ameasa bá vida umanu, ita konsidera ne’e gráve,” Xefe Departamentu Investigasaun Kriminál Nasionál, Superintendente Polísia João dos Reis Belo, informa bá Jornalista sira iha Kuartel Jerál PNTL.

“Tuir informasaun ne’ebé mak ita hetan katak, kazu ne’e tuir loloos akontese kleur tiha ona, kuaje fulan-rua ka tolu ona. Mais, publikasaun ita foin hetan, durante ne’e mós vítima sira ta’uk atu relata informasaun ne’e bá polísia, ne’ebé, ohin, mak polísia foin halo servisu maka’a  para bele rekolla informasaun hotu, hodi submete bá iha ministériu públiku,” nia informa.

Identifika Ona Sidadaun Na’in-rua

Hafoin akompaña tiha video ne’ebé espalla iha media sosiál, Investigadór sira iha DIK Nasionál mós bolu ona vítima na’in-rua, ida feto ho inisiál IJNC (tinan 14) no ida mane ho inisial KVdR, hodi halo identifikasaun.

“Primeiru, ita aprosima bá família para bele hato’o keixa mai iha investigasaun kriminál, no imediatamente, vítima ita refere ona bá iha parte protesaun vítima nnian, depois investigasaun kriminál sei buka autór sira ne’ebé mak envolve iha laran para responsábiliza bá sira nia asaun ne’ebé mak sira halo ona. Investigasaun mak sei termina, sé sé mak envolve, responsábiliza indivíduu bá hahalok ne’ebé sira halo,” Superintendente Polísia João dos Reis Belo hateten.

Polísia mós kontinua buka tuir sidadaun mane ida seluk, ne’ebé deskonfia iha altura ne’ebá ho ninia motorizada, tula sidadaun feto ne’e bá to’o iha ai-laran parte Beduku nian.

Jornalista: Rogério Pereira Cárceres