Estudante Finalista 848 La Pasa iha Ezame Nasionál

Hatutan.com, (13 Dezembru 2024), Díli- Ministériu Edukasaun anúnsiu rezultadu ezame nasionál tinan letivu 2024 nian  iha territóriu nasionál hatudu katák estudante finalista hamutuk  848 mak la pasa iha ezame nasionál tanba la preinxe rekizitu  ne’ebé estabelesidu.

Estudante sira hosi eskola balu, ne’ebé selebra sussesu ezame nasionál tinan 2023 ho pinta farda no virál iha média sosiál. Foto/foti hosi Facebook.

Koordenadór Kurríkulu Ministériu Edukasaun, João Maupelo, Sesta (13/12/2024) iha edifisiu ME iha Vila-Verde, Díli,  informa númeru totál husi estudante finalista bá  ezame nasionál tinan letivu 2024 hamutuk 55,661 pesoa ne’ebé kompostu husi ensinu báziku 28,218, ensinu sekundáriu jerál 23,661 ensinu tékniku vokasionál 3.733  no ensinu rekorrente 364 pesoa.

Númeru totál estudante ensinu báziku ne’ebé partisipa iha  ezame nasionál hamutuk 27,954 pesoa, no na’in 262 mak la partisipa. Enkuantu estudante ensinu sekundáriu jerál 2,.322 pesoa mak partisipa iha ezame nasionál no  339 pesoa mak la partisipa. Ensinu sekundáriu tékniku vokasionál 3682 pesoa mak partisipa ezame nasionál no na’in 51 mak la partisipa. Ensinu rekorrente 337 pesoa mak partisipa ezame nasionál no na’in 27 mak la partisipa.

Rezultadu korresaun bá ezame nasionál hatudu katák Estudante Ensinu báziku  27,470 mak hetan rezultadu aprovadu  (pasa) 98.27%, enkuantu  484 estudante  ka 1,73% mak reprovadu  (la pasa) ne’ebé la prenxe rekizitu.

Ensinu sekundáriu jerál  iha estudante 22,922 e mak hetan rezultadu  aprovadu  (pasa) 98,20%  no 400 estudante  ka 1,72% mak hetan rezultadu reprovadu (la pasa).

Ensinu Sekundáriu  tékniku vokasionál  no  ensinu rekorrente estudante  100% mak hetan rezultadu aprovadu (pasa).

Iha fatin hanesan Ministra Edukasaun Dulxe de Jesus subliña  katák bainhira ME hatuur sistema ida ho  jestaun ida ne’ebé mak di’ak fó rezultadu ne’ebé mak di’ak duni. Tanba ne’e rezultadu tinan ida-ne’e kompara ho tinan liubá iha deferénsia boot tebe-tebes tinan liubá  iha purvolta 3,500 itál  alunu mak la pasa iha ezame.

“Ami mós halo analiza bá estudante reprovadu sira ne’e, katák laiha indikasaun katák sira  reprovadu ne’e tanba eskola ne’ebá profesór laiha, dala ida tán bele mai verifika iha Ministériu Edukasaun ida-ne’e mós ME halo analiza haree bá dadus sira, laiha problema katák profesor la to’o,” Ministra Dulce de Jesus hateten hafoin ofisiálmente fó sai rezultadu ezame Nasionál iha Edifísiu ME.

Ministra Edukasaun afirma sai problema katák atu investiga tanba saida mak profesór kompletu maibé alunu reprovadu barak iha eskola sira ne’ebé mak profesór sira kompletu ida-ne’e mak tenke halo estudu kle’an para atu hatene problema ne’e iha ne’ebé.

Jornalista Estajiária: Zita Menezes