Projetu Emerjénsia Estrada Rurál iha RAEOA Sei Gasta Millaun $5-liu

Hatutan.com, (13 Dezembru 2024), Díli—Prezidente Autoridade Rejiaun Administrativu Espesiál Oé-Cusse (PA RAEOA), Rogério Tiago de Fátima Lobato, informa sira sei aloka osan millaun $5-liu ba projetu emerjénsia sira ne’ebe identifikadu ona atu ezekuta iha área rurál sira iha RAEOA.

Lee Mós: Proposta OJE 2025 bá RAEOA Millaun $62-resin, PN Husu Rogério Lobato Dezenvolve Área Produtivu

Prezidente Autoridade RAEOA, Rogério Tiago de Fátima Lobato. Foto/Dok.

Ba servisu ida-ne’e, Sesta (13/12/2024), Prezidente Autoridade RAEOA, Rogério Lobato relata ona ba Primeiru-Ministru (PM), Kay Rala Xanana Gusmão  hodi dehan katak projetu emerjénsia ba estrada hirak ne’e hanesan esforsu ida hodi bele tulun komunidade sira ne’ebe hela iha área rurál ne’ebe durante 20 nia laran la asesu ho di’ak.

“Ne’e projetu emerjénsia tanba ita tenke hasai lalais ita nia komunidade sira husi izolamentu tanba fatin ka dalan husi Oé-Cusse ba Passabe la di’ak, Passabe ba Nitibe la di’ak no estrada  Pantai Makasar ba Nitibe la di’ak durante tinan 20 liu ona,” Rogério Lobato informa ba jornalista sira iha Palásiu Governu.

PA RAEOA ne’e afirma katak durante projetu ne’e la’o hetan kolaborasaun d’iak husi komunidade nune’e komunidade  sira mak hasai sira nia lutu no kona-ba kompensasaun PA RAEOA prontu bainhira alargamentu estrada tama iha komunidade nia área hodi  hasai komunidade sira nia ai-balun.

“Mana ba projetu emerjénsia estrada ne’e 90% husi emprezáriu  Oé-Cusse oan de’it. Ha’u bele dehan 90%,” Rogério Lobato hateten.

Estrada sira ne’e ho naruk kuaze  besik kilómetru 90 ne’e sei halo alargamentu ne’ebe husi trosu Oesilo ba Passabe, husi Tuni ba iha Tono no ba iha foho sira nune’e populasaun sira bele la’o avontade.

PA RAEOA mós iha planu  sei konvida diretór nasionál Ajénsia Dezenvolvimentu Nasionál (ADN) hodi ba halo fiskalizasaun no inspesaun ba projetu estrada sira ne’e .

Jornalista: Leopoldina de Carvalho