RAEOA iha Tusan Millaun $8

Hatutan.com, (15 Dezembru 2024), Díli—Prezidente Autoridade Rejiaun Administrativu Espesiál Oé-Cuse Ambeno (PA-RAEOA), Rogério Tiago de Fátima Lobato, konfirma katak dezde 2017 to’o mai 2024 ne’e, RAEOA iha dívida ka tusan puvolta millaun $8-resin.

Lee Mós: Projetu Emerjénsia Estrada Rurál iha RAEOA Sei Gasta Millaun $5-liu

Timoroan barak iha área remota sei moris iha kondisaun ki’ak no mukit tebes. Imajen ne’e inan feto ida nia kondisaun uma iha Oé-Cusse. Foto/Dok.Agus Caet

Dívida ka tusan sira-ne’e, Rogério Lobato hateten, mai hosi projetu sira ne’ebé balun on going hela, balun finaliza ona mas seidauk halo pagamentu, inklui uma balu ne’ebé harii dezde 2017 to’o agora seidauk halo pagamentu. Ho nune’e, osan sira ne’ebé PN aprova ba RAEOA kontinua selu tusan ka dívida sira-ne’e.

“To’o agora RAEOA sidauk halo infraestrutura foun tanba osan sira ne’e hodi selu de’it tusan  2017 to’o agora, ne’ebé antigu mandatu PA-RAEOA sira husik hela, Montante tusna sira-ne’e kuaze millaun $8,” Rogério Tiago de Fátima Lobato informa ba jornalista sira hafoin hasoru malu ho Primeiru-Minisru  (PM), Kay Rala Xanana Gusmão iha Palásiu Governu, Sesta liubá.  

Uma balun ba médiku sira nian iha Nitibe to’o agora seidauk halo pagamentu, nune’e PA-RAEOA atuál tenke halo ezersísiu orsamentál hodi halo pagamentu ba projetu uma refere no hanesan PA-RAEOa foun iha responsabilidade atu kontinua obra sira ne’ebé husik hela hanesan legacy ba Estadu.

Hapara Projetu Estrada Noefefan ba Oenunu Tanba Kustu Millaun $22

PA-RAEOA, Rogério Tiago de Fátima Lobato, relata mós katak durante nia mandatu hapara ona projetu estrada husi diresaun Noefefan ba Oenunu tanba deskonfia viola kontratu no nia kustu millaun $22.

Avó feto ida nia kondisaun uma no kondisaun moris iha Oé-Cusse. Foto/Dok. Pajina Asesór Asuntu Sosiál RAEOA

Rogério Lobato hateten, projetu estrada ho distánsia la to’o kilómetru 12 ne’e gasta osab kuaze millaun $22.

“Ami haruka para tanba estrada ne’e halo la tuir padraun sira, viola termu kontratu. Ami sei loke fali konkursu públiku foun no haree fali se mak manan hodi kontinua  estrada ne’ebé husi Oenunu ba to’o Citrana,” Rogério hateten.

Kona-bá estrada husi Oetono ba Oesilo ne’ebé nia distánsia  la to’o kilómetru  17, maibé  aloka orsamentu ho valór  millaun $33, tuir Rogério Lobato, la’ós buat ida normal, tanba pratika iha Timor ne’e estrada rural másimu  bele gasta de’it millaun $1.

“Estrada iha Oetono ne’e gasta kuaze millaun $2 kada kilómetru, ami haruka kontinua maibé sei to’o de’it Oesilo ka osan ne’e bele liu tan ba Oesilo diresaun ba Oetasi,” Nia haktuir.  

Antes ne’e Primeiru-Ministru Xanana Gusmão haruka ona delegasaun boot ida hodi apoiu ekipa RAEOA halo verifikasaun ba obra sira ne’e  hotu no tuir identifikasaun ba obra sira  ne’e dehan konklui 70% maibé hafoin verifika obra sira balun sidauk to’o 70%, entaun  bainhira selu tiha ona to’o  70%,  maibé se projetu ne’e sei 30 % ka 40 % ne’e osan ne’e tenke fo fila ka deskonta baihira sira kompleta sira nia projetu.

Jornalista: Leopoldina de Carvalho