PLP Husu CAC Investiga Oan Mane Ministra MSSI, Verónica: “Ha’u ho Ha’u Nia Oan Mós Prontu”

Hatutan.com, (17 Dezembru 2024), Díli– Xefe Bankada PLP iha Parlamentu Nasionál, Maria Angelina Sarmento, husu Komisaun Anti-Korrupsaun (CAC, sigla portugés)  halo investigasaun bá  Ministra Solidariedade, Sosiál no Inkluzaun (MSSI),  Verónica das Dorres nia oan mane ne’ebé viral iha Média sosiál  Facebook, katák sai broker iha MSSI.

Lee Mós: Tribunál Haruka CAC Halibur Tán Evidénsia Kona-bá Kazu Abuzu Poder iha MAPPF

Ministra Solidariedade, Sosiál no Inkluzaun (MSSI), Verónica das Dorres. Foto/Zita Menezes

“Ha’u hakarak foti informasaun ne’ebé viral iha média sosiál kona-bá  Ministra Verónica das Dorres nia oan mane ne’ebé sai broker bá projetu sira iha MSSI, asuntu ida-ne’e viral tebes iha média sosiál, Facebook la hatene inan mak ezekutivu, maibé oan sira mós halo aan hanesan ezekutivu hotu,” Duputada Maria Angelina Sarmento hateten iha nia intervensaun  iha plenária PN, Tersa (17/12/2024).

Deputada Maria Angelina Sarmento hateten sira-nia hatais mak kazaku gravatadu, maibé mentalidade broker, ida-ne’e nasaun atu sai oinsá no atu la’o bá ne’ebé  no kompañia sira ne’ebé mak hetan projetu tenke liuohusi Ministra Verónica  das Dorres nia oan mane no nia oan mane mak  autoriza fó tiha persen mak foin bele hetan projeitu.

“Ida-ne’e ami husu bá CAC atu bele investiga, tanba iha fulan hirak liubá Diretór Ministériu Agrikultura nia mós halo buat ne’ebé hanesan, viral iha média sosiál Facebook. Diretór ne’e hetan duni xamada no prosesu  ona iha  CAC, ami husu atu CAC halo mós prosesa bá Ministra MSSI nian oan ne’ebé mak sai broker iha MSSI,” Deputada Maria Angelina Sarmento afirma.

Ministra Solidaridade Sosiál no Inkluzaun (MSSI), Verónica das Dorres ne’ebé jornalista sira konfirma hateten, dezde kedas 2023-2024, prosesu aprovizionamentu iha MSSI  la’o tuir mandamentu Lei Rejime Juridiku aprovizionamentu (RJA) no ekipa Aprovizionamentu MSSI nian mak iha kompeténsia no knar atu halo prosesu hotu konkursu públiku refleta ba valor sira iha RJA.

“Ha’u atu klarifika ba  públiku  katák ha’u nian oan la servisu iha MSSI no ha’u nian oan mane nunka tama bá kompañia sira  ne’ebé manan projetu iha MSSI. Bele buka informasaun hotu sé bele  CAC ho PNTL bele mai investiga ha’u prontu no  ha’u nian oan mós prontu,” Ministra Verónica das Dorres  afirma. 

Ministra  Verónica das Dorres mós klarifka katák imajen nian oan mane ne’ebé  agora daudaun viral iha Facebook ne’e imajen iha familia de’it mak iha no sira la públika iha mídia, nune’e nia konsidera família balu mak espalla informasaun hirak ne’e.

“Ha’u mós hateten katák parte sira hanesan CAC bele buka tuir karik ami iha kompañia sira  nia laran ka lae, bele buka tuir, tanba ha’u nian oan momentu ne’e servisu hamtutuk ho ema liur, ninian servisu la tama ka la hola parte iha MSSI. Dala-ida tán, CAC ka instituisaun sé de’it bele mai bolu ha’u no ha’u nian oan bele klarifika asuntu ida-ne’e, maibé ikus liu ha’u hateten katák ne’e família mak halo, ema ida ne’ebé uluk halo bá Ministériu Agrikultura ema ida-ne’e mak halo mai ha’u no la’ós ema seluk,” Nia afirma.

Ministra Verónica das Dorres konsidera informasaun ne’ebé espalla iha média sosiál  Facebook kona-bá nian oan mane ne’e  vigansa ka laran moras mak espalla no informasaun  laloos ne’e.

Jornalista Estajiária : Zita Menezes