Komisaun G-PN Identifika Eskola Balu iha Munisípiu Menus Profesór

Hatutan.com, (18 Dezembru 2024), Díli– Parlamentu Nasionál liuhosi  Komisaun G ne’ebé trata asuntu Edukasaun, Joventude, Kultura no Sidadania, iha sira-nia fiskalizaun halo iha Munisípiu Manatuto, Ainaro, Covalima no Lautem, hatudu prova, katak  eskoa balu kontínua menus profesór.

Lee Mós: Komisaun G Detekta Eskola FINANTIL Akumula Estudante 80 iha Sala Ida

Estudante sira lori fila jerigen bá uma hafoin sira kontribui lori bee-moos husi uma bá eskola. Foto/Lazaro Pereira Quefi

“Rezultadu fiskalizaun ne’ebé ami hetan iha eskola balu profesór ne’ebé menus duni, nune’e ami rekomenda ona bá Minstériu Edukasaun, aliende infraestrutura ita haree katák iha infrestruta balu ne’ebé 100% ona, maibé seidauk selu,” Prezidenti Komisaun G-PN, Deputadu Armando Lopes bá Jornalista sira iha PN, Kuarta (18/12/2024).

Nia afirma bazeia bá fiar ne’ebé Minstériu Edukasaun fó bá  NGO Belun ne’ebé mak durante ne’e halo mapamentu bá profesór sira kada  eskola, maibé eskola balu menus nafatin profesór. Nune’e, Komisaun G rekomenda ona bá Minstériu Edukasaun atu haree kestaun ida-ne’e, tanba tuir fiskalizaun komisaun G iha terrenu identifika a eskola balu ne’ebé mak menus duni profesores no eskola balu profesorés liu.

“Ho rezolusaun numeru 3  liuhosi teste kandidatu bá profesór sira mak ita bele hadook aan husi grupu familiarizmu, nepotismu, nune’e ami rekomenda ona bá Minstériu Edukasaun atu tempu badak bele rezolve situasaun menus profesór,” Nia tenik.

Iha sorin seluk Komisaun G mós idéntifika iha Munisipíu Lautém iha infraestrutura balu ne’ebé mak halo iha fatin rai hala,i nune’e bainhira tempu udan bele estraga fila-fali de’it konstrusaun  ne’ebé mak halo ona.

Jornalista Estajiária Zita Menezes