Maromak Halo An Ki’ik Atu Ema Besik ba Nia no Simu Rahun Di’ak iha Moris

Hatutan.com, (24 Dezembru 2024), Díli- Iha kalan natal mak Maromak halo an ki’ik atu ema besik ba Nia no simu rahun diak ka grasa iha moris ne’e hodi servi maun-alin sira ho ksolok no domin.

Lee Mós: Natal, Tempu Fahe Ksolok no Hakle’an Fraternidade Umana iha Sosiedade

Arsebispu Arkedioseze Metropolitana Díli, Dom Virgílio Kardeál do Carmo da Silva, SDB. Foto/Dok

Arsebispu Arkedioseze Metropolitana Díli, Dom Virgílio Kardeál do Carmo da Silva, SDB iha nia omilia ba Missa Natal kalan iha Igreja Parókia Imaculada Conceição, Katedrál, Díli, Tersa (24/12/2014).

Dom Virgílio haktuir bibi-atan sira ne’ebé toba hein bibi haree Maromak Nia Gloria ne’ebé mosu nabilan ho naroman bo’ot ida. Nakukun bo’ot ida ne’ebé falun hela rai, mosu naroman bo’ot iha Lalehan. Naroman bo’ot ne’e mosu iha nakukun laran, ne’e katak Maromak Nia rahun diak, Maromak Nia grasa mak mosu mai, lori salvasaun ba umanidade tomak.

Maromak Nia domin mak domin ida ne’ebé transforma moris, hafoun istória, liberta buat ne’ebé aat, no domin ida ne’ebé lori dame no ksolok.

Kalan ne’e Maromak hatudu Nia domin ba povu sarani fiar nain liu husi Nia Oan Jesus, iha Jesus ne’ebé as liu hotu, halo an ki’ik liu ema hotu-hotu, atu ema bele hatene hadomi no besik ba Nia.

Iha leitura sira, São Paulo hateten Maromak ne’ebé mai ne’e Grasa ida, tamba buat ne’ebé Maromak fo gratuita ka saugate, atu hatudu katak iha mundu ne’e buat hotu lao iha lojika ida, Fo no Simu, maibé ho Maromak laiha Fo no Simu maibé iha deit buat ida naran gratuita.

“Maromak Nia domin ita la negosia maske ita la soi atu simu, nune’e mos ita nunka bele rekompensa. Maromak Nia domin ne’ebé fo ita ema la iha abilidade atu rekompensa buat ne’ebé mak Nai Maromak fo mai ita, tan ne’e grasa ida ne’ebé Maromak fo gratuita. Maromak Nia grasa mosu husi kalan ne’e, kalan ne’ebé ita rekoñese maske ita la soi. Nia halo na ki’ik liu buat hotu-hotu, Nia mai hela iha ita nia leet atu ita hetan grasa.” Hateten Arsebispu Arkedioseze Metropolitana Díli, Dom Virgílio Kardeal do Carmo da Silva.

Nai Nia natal atu fo hatene fali katak Maromak hanoin nafatin Nia povu, Maromak hadomi ema ida-idak. Mai ema ida-idak husu ba nia an hodi dehan ‘Há’u hadomi o” hanesan Maromak mos dehan ba ema ida-idak “Há’u hadomi o”, no sei “Hadomi nafatin o” maske ema ida-idak sente folin laek, maibé ba Maromak iha nia futar oin, ema ida-idak úniku,  lahanesan, maske dalaruma tamba sirkunstánsia ruma obriga atu ema dok husi Maromak, maibé Maromak nunka fila kotuk ba Nia povu, tamba Maromak hakarak ema ida-idak nia diak, maske ema sala, Maromak hadomi ema nafatin, Maromak nia domin ba ema nunka menus, ema mak dúvida kona-ba domin ba Maromak.

Domin ida ne’e mak grasa ne’ebé ema deskobre iha kalan natal, ema deskobre katak buat hotu ne’ebé mai husi Maromak gratuita. Maromak Nia oan mai moris kiak atu konkista rikusoin bo’ot ida mak rikusoin domin nian, tan Maromak nia grasa mosu mai hanesan furak ka beleza, buat ne’ebé halo ema furak mak ilas Maromak nian ne’ebé ema ida-idak lori iha nia an rasik.

Ohin Maromak hakarak mos dehan buat importante ba povu ne’e, keta tauk, ema ida-idak iha nia nakuku, nakukun kona-ba moris família nian, nakukun karik iha servisu fatin, nakukun ho buat ida-idak ne’ebé ema enfrenta iha moris husi dader too kalan, husi segunda too sabadu, no iha buat barak ne’ebé halo ema moris hela iha nakukun ida ne’e nia laran, maibé iha natal ne’e Maromak bolu ema hotu atu keta tauk, korajen, keta dezanima, keta lakon Esperansa, tamba iha kalan ne’e mak domin konkista ka halakon tauk.

Esperansa foun ne’ebé mosu mai halakon tiha nakukun arogansia nian, ne’edunik saida mak tenke halo ho gransa ne’ebé Maromak fo ba ema ida-idak mak simu.

“Mai ita hare ba Prezépiu, hare ba kosok oan Jesus, hodi fo hanoin mai ita atu fo tempu ba Nia atu hadomi ita. Dala barak Maromak buka ita, maibé ita mak dehan tempu la iha. Liu husi ida ne’e, ida ne’eba Maromak buka hela ita, maibé dala barak ita mak tenpu la iha. Tamba ne’e iha tempu natal ita aprende atu husi Maromak tama ita nia moris, hadomi ita, tama iha ita nia moris ne’ebé dalabarak sente sabraut no husik Maromak tama iha ita nia sosiédade, kreda, no mundu ne’ebé ohin loron violénsia iha fatin oin-oin, tamba dala barak ita mak planu no nunka husu Maromak atu hola parte.” Tenik Arsebispu.

Natal ne’e konvida mos ema ida-idak atu la too deit preokupa ho nia an, se nia mos bele halo ema seluk kontete, ida ne’e mak Jesus Maromak aon ma hanorin ba ema.

Ema ida-idak mos bele sai hanesan prezente katak fo sentidu ida ba moris ne’ebé Nai Maromak fo. No fo folin ba moris ida ne’e, tan moris ne’ebé Nai Maromak fo ba ema ida-idak ne’e la naruk ida.

Tan ne’e moris ne’e prezente bo’ot ida ne’ebé Nai Maromak fo ba ema ida-idak, no prezente ida ne’e ema ida-idak koko atu fo liutan sentidu, fo folin, valoriza moris ida ne’e.

Ba joven m sira atu hatene valoriza mos imi nia moris hanesan foin-sa’e, hatene fo folin ba moris ne’e mak foin ema seluk mos fo folin ba moris ida ne’e. Tamba ida ne’e mak dalan furak liu atu ema ida ka foin-sa’e ida halo mudansa ba nia na.

Mai ida-idak, iha natal ne’e bele transforma na, atu naroman ne’ebé simu iha natal ne’e, bele mos fahe ba ema seluk, no halo naroman natal nian nabilan iha ida-idak nia moris. Agradese ba Maromak ba oportunidade ida ne’e, ba grasa no bensaun ne’ebé simu iha kalan natal ne’e.

Jornalista: Vito Salvadór