UPM Fírme Halo Operasaun Kontrola Sidadaun Selebra Tinan-foun 2025 iha Tasi-Ibun sira

Hatutan.com, (27 Dezembru 2024), Díli-Polísia Nasionál Timor-Leste (PNTL), Unidade Polísia Marítima (UPM), fírme hala’o operasaun iha tasi hodi kontrola sidadaun  ne’ebé baibain selebra  tinan foun, 01 fulan-Janeiru 2025 iha área kosteira ka tasi-ibun sira.

Lee Mós: Durante Natál, PNTL Detein Joven 21

Komandante UPM, Superintendente Polísia Eugénio Pereira. Foto/Rogério Pereira Cárceres

Komandante UPM, Superintendente Polísia Eugénio Pereira, informa baze bá ordém operasaun nian ne’ebé  aprova hosi komandante jerál PNTL ba Unidade Polísia Marítima, sei halo nafatin sira-nia vizijilánsia iha zona marítima ho objetivu  atu kontrola komunidade sira ne’ebé mak halo paseiu bá iha área kosteira.

“Intermu prevensaun, liuhosi vizilánsia postu nian  sempre avizu bá komunidade sira, oinsá mak atu bele kuidadu iha sira-nia atividades passeiu no alende ne’e, ita mós koloka ita nia LÁR (Lansa Rápido) ró sira,” Komandante Eugénio Pereira, informa bá Jornalista sira iha Kuartel UPM iha Largo Lecidere-Díli, Sesta (27/12/2024).

UPM mós servisu hamutuk ho Komponente Naval F-FDTL junta rekursu umanu no mós ho ekipamentu sira, inklui transporte sira marítima nian hodi apoiu malu. Operasoens ne’e konjuntamente halo entre komponente rua, tantu hosi Navál ho Marítima, no bazeia mós bá diretiva hosi komandu rua.

UPM hanesan entidade ida ne’ebé maka responsábiliza seguransa bá iha área Kosteira, iha sira-nia misaun ida oinsá mak atu halo salvamentu no mós ho buska, ne’ebé mak orienta liubá iha dezastre.

UPM nafatin ho ninia prinsípiu kona-bá oinsá maka prevene nia sidadaun sira atu labele monu bá iha dezastre.

“Entaun, preventiva mak ne’e, ita sempre husu bá komunidade sira atu sempre kuidadu no haree mós bá iha ita-ninia kondisaun klima tasi nian, anin, no mós ondas,” komandante UPM ne’e fó hanoin.

Unidade Polísia Marítima (UPM) estabelese ona ninia postu hamutuk 10 iha zona kosteira iha territóriu nasionál. Postu sira ne’e, iha Kosta Súl, estabelese ida Suai-Covalima, Kosta Norte nian, iha postu hira kedas, liu-liu iha fronteira, hahú hosi Batugade mai to’o iha Loes. Hosi parte Leste ninian mak iha Suku Com, Postu Administrativu Lospalos, Munisípiu Lautem.

Jornalista: Rogério Pereira Cárceres