Figura Imprensa Indonézia Atmakusumah Astraatmadja Husik Iis

Hatutan.com, (02 Janeiru 2025), Díli–Mundu imprensa ka pers Indonézia lutu todan. Figura ne’ebé dedika án tomak ba advokasia liberdade imprensa no kualidade jornalizmu iha Indonézia, Atmakusumah Astraatmadja, hakotu iis  iha Jakarta, Kinta (02/01/2025).

Atmakusumah Astraatmadja entrega livru ba Xefe Redasaun Hatutan.com, Francisco Belo Simões iha vizita ofisiál ida ba Lembaga Pers Dr. Soetomo (LPDS), Jakarta, tinan hirak liubá. Foto/dok

Sita hosi kompas.id relata figura imprensa nasionál Indonézia, Atmakusumah Astraatmadja hakotu iis ho idade 86 iha Ospitál Cipto Mangunkusumo (RSCM), Jakarta Sentrál, hale’u tuku 13.05 oras indonézia oeste (WIB, sigla indonézia).

“Inalillahi Wa Inna Ilaihi Rojiun. Atmakusumah Astraatmadja husik  ona iis ho idade 86, ohin, 02 Janeiru 2025, tuku 13.05 WIB.  Husik hela feen no oan-mane na’in tolu.” Ida-ne’e mak mensajen WhatsApp ne’ebé xefe redasaun Hatutan.com simu hosi Shauri, funsionáriu Lembaga Pers Dr. Soetomo (LPDS)-Jakarta.

Metebian Atmakusumah Astraatmadja husik hela feen ida, Sri Rumiati, hamutuk ho oan-mane na’in tolu; Kresnahutama Astraatmadja, Rama Ardana Astraatmadja, ho Tri Laksmana Astraatmadja.

Mane ne’ebé kaer Kartaun Imprensa Númeru Ida (PCNO) husi komunidade Loron Nasionál Imprensa (HPN) 2010 hakotu iis tanba moras.

Prezidente Konsellu  Imprensa Indonézia, Ninik Rahayu, hateten dedikasaun matebian ne’ebé moris iha Labuan, Banten iha loron 20 Outubru 1938, la’ós de’it halo Indonézia orgullu, maibé hetan mós rekoñesimentu internasionál.

Mundu imprensa Indonézia lakon duni nia figura. “Innalillahi Wa Inna Ilaihi Rojiun. Adeus Sr. Atmakusuma. Maromak hakarak, husnul khotimah. Amen,”  Ninik haktuir iha nia mensajen.

Atmakusumah maka Prezidente Konsellu Imprensa independente dahuluk iha istória Indonézia nian períodu 2000-2003. Tanba, dezde harii iha tinan 1968, Prezidente Konsellu Imprensa sempre kaer hosi Ministru Informasaun ne’ebé hetan kna’ar atu haburas kreximentu imprensa nasionál hamutuk ho governu.

Prezidente Konsellu Imprensa Indonézia, Ninik Rahayu fó Prémiu Dedikasaun Vida ba Atmakusumah Astraatmadja iha Prémiu Konsellu Imprensa nian iha loron 10 fulan-Novembru tinan 2023 iha Jakarta. Foto/DPI

Ida ne’e bazeia ba Lei Númeru 11 tinan 1966 kona-bá Dispozisaun Bázika bá Imprensa ne’ebé asina husi Prezidente Soekarno. Regulamentu ida-ne’e hafoin hetan revizaun ho Lei Númeru 40 tinan 1999 kona-bá Imprensa hosi Prezidente Repúblika Indonézia ba dala-3, Bacharuddin Jusuf Habibie.

Lei 40/1999 kona-bá Imprensa transforma ona Konsellu Imprensa ba instituisaun independente ida ne’ebé nia prezidente eleitu demokrátikamente kada tinan tolu husi organizasaun jornalista sira, empreza imprensa no figura komunitária sira.

Atmakusumah servisu hosi 2000 to’o 2004. Bainhira simu Prémiu Realizasaun Vida nian iha Prémiu Konsellu Imprensa nian iha loron 10 fulan-Novembru tinan 2023, Atmakusumah hatete katak luta ba liberdade imprensa iha Indonézia la’ós fásil. Jornalista barak hetan teror tanba sira krítiku, no to’o mídia  hetan bandu tanba kritika autoridade sira.

Atmakusumah subliña katak Lei 40/1999 hamutuk ho garantia liberdade espresaun no opiniaun nu’udár fuan husi luta pasadu husi imprensa ne’ebé tenke mantein nafatin to’o ohin loron. Nia iha hanoin katak kondisaun imprensa oras ne’e sai di’ak, tanba ne’e labele ba kotuk hanesan uluk.

“Espera katak lei sei kontinua aplika. Liberdade imprensa agora daudaun la’o iha diresaun pozitivu, maibé sei sai estrañu tebes bainhira ita-nia esperiénsia pasadu akontese (dala ida tan),” Atmakusumah hateten.

Iha nia kareira jornalizmu, Atmakusumah koñesidu nu’udár editór iha Harian Indonesia Raya ho Mochtar Lubis, editór iha Ajénsia Notisia Antara, no editór iha Biro Pers Indonézia (PIA) iha Jakarta.

Jornalista Timoroan balun ne’ebé tuir formasuan jornalizmu nian iha LPDS-Jakarta foto hamutuk ho Atmakusumah Astraatmadja no fasilitadór sira iha formadór sira iha LPDS. Foto/Dok.LPDS

Nia mós sai hanesan emisór iha Rádiu Austrália (ABC) iha Melbourne, Austrália, no Deutsche Welle (Rádiu Alemaña) iha Koeln, Alemaña. Aleinde ida-ne’e, nia mós serbisu nu’udár Prezidente Ekipa Provedór Kompas nian (2000-2003).

Atmakusumah koñesidu mós hanesan hakerek-na’in no kolumnista. Nia hakerek sira mosu ona iha: Kompas Daily, Sinar Harapan, The Jakarta Post, Republika, Suara Karya; Tempo Magazine, D & R (Democracy & Reform), Prisma, Optimist, Femina, X-tra, Intisari, Editor, Justice Forum, Independent Watch, Trust; edisaun findesemana jornal semanal Media Indonesia Minggu, Bisnis Indonesia Minggu; no Tempo Interactive Internet media (Jakarta); ba revista Reflexie (Haia, Olanda).

Prémiu oioin ne’ebé  Atmakusumah simu ona inklui; 2000 Prémiu Ramon Magsaysay iha kategoria Jornalizmu, Literatura no Arte Komunikasaun Kriativu hosi The Ramon Magsaysay Award Foundation iha Manila, Filipina; Prémiu Liberdade Imprensa 2008 husi Aliansa Jornalista Independente, no Medalla Osan Mean Liberdade Imprensa Loron Nasionál Imprensa 2011 nian.

Jornalista: Vito Salvadór