Indonézia Fó Hatene Ona Atu Hahú Negosiasaun Fronteira Marítima ho Timor-Leste

Hatutan.com, (09 Janeiru 2025), Díli- Primeiru-Ministru, Kay Rala Xanana Gusmão, Kinta (09/01/2025), informa Governu Indonézia fó hatene ona atu hahú negosiasaun fronteira marítima ho Timor-Leste iha tinan ne’e nia laran.

Lee Mós: Ramos-Horta Tau Konfiansa Tomak bá Xanana Solusiona Problema Naktuka

Primeiru-Ministru Kay Rala Xanana Gusmão. Foto/Tome da Silva

“Hakarak atu informa iha ne’e katak sira husi Governu Indonézia fó hatene ona atu hahú negosiasaun fronteira marítima,” Primeiru-Ministru Kay Rala Xanana Gusmão informa ba jornalista sira iha Palásiu Prezidensiál hafoin hasoru malu ho Prezidente Repúblika José Ramos-Horta.

Xefe Governu hatutan uluk ne’e to’ós, mais agora mezmu ho Naktuka ne’ebé seidauk karik mós, fronteira Oé-Cusse nian ne’e husi Naktuka mai de’it baliza iha ne’ebá ne’e, la liga malu ho Mota Ain ba to’o fali Salele.

“Ne’ebé karik tinan ida mós atu hahú ita haree to’ok, tanba ita presiza. Presiza hodi bele kontrola peska ilegál ne’ebé la’o hela iha ita nia tasi mane. Ne’ebé ita haree to’ok buat ne’e bele ajuda ita barak tebe-tebes.” Hakotu Primeiru-Ministru Kay Rala Xanana Gusmão.

Iha primeiru enkontru ho Prezidente Repúblika ne’e la’ós atu ko’alia barak, la’ós mós atu ko’alia buat hotu-hotu kedas, maibé pelumenus iha fulan tolu primeiru ne’e atu halo buat ruma.

Jornalista: Vito Salvadór