Presiza Investigasaun Kle’an ba Kazu Tiru Tama Rezidénsia Lú-Olo

Hatutan.com, (09 Janeiru 2025), Díli- Primeiru-Ministru Kay Rala Xanana Gusmão hateten kona-ba akontesimentu tiru kilat-musan tama  ba eis Prezidente Repúblika, Francisco Guterres “Lú-Olo” nia reziliénsia iha Faról, foin lalais ne’e.

Lee Mós: Atensaun! Ema Deskoñesidu Tiru Kilat Musan Tama To’o Rezidénsia Lú Olo

Primeiru-Ministru Kay Rala Xanana Gusmão. Foto/Tome da Silva

“Kona-ba tiru kilat-musan ba iha rezidénsia Eis-Prezidente Repúblika Francisco Guterres “Lú-Olo” ne’e ha’u la hatene, ami haree tiha ona, ha’u ne’e soldadu ida ha’u hatene kilat-musan ne’e nusa,” Primeiru-Ministru Kay Rala Xanana Gusmão hateten hodi responde jornalista sira iha Palásiu Prezidensiál hafoin hasoru malu ho Prezidente Repúblika José Ramos-Horta, Kinta (09/01/2025).

Xanana admira mak kilat-musan ida sa’e ba leten tun fali mai, iha fatin seluk mós rona ida-ne’e, imi mak diskute, atan-oan ne’e soldadu, kilat mós la hatene kaer tan, ne’ebé la komprende buat ida ne’e.

“Iha ne’ebá ha’u nunka tama tanba metin, seguransa maka’as. Atan oan ha’u ne’e iha Portugés nia tempu soldadu ida, iha tempu bapak nian ne’e ha’u la’o ba mai subar an de’it ne’ebé tiru kilat-musan ba leten monu hanesan ne’e tenke investiga, ha’u tenke komprende ida ne’e. Iha fali kazu ida seluk kilat musan tama tiha husi uma-leten monu fali ba kraik labarik ida toba iha kama leten, ne’e sá kilat musan ida mak ne’e, uluk ha’u sei ki’ik tama soldadu buat ne’e laiha, ita tenke hatene buat ne’e halo nusa,” Xanana Gusmão haktuir.

Nia subliña tenke halo investigasaun, primeiru tenke hatene kilat ne’e kilat saida, tanba Xanana admira, horisehik loke iha Konsellu Ministru ha’u dehan wao, ha’u mós ta’uk, tiru ba leten tama uma-kakuluk nia fura tiha tun ba fali ne’ebá, ne’e mak ha’u dehan ha’u la hatene, ne’ebé halo la komprende buat ida ne’e, ne’ebé ami sei investiga.

Iha Kuarta madrugada (01/01/2025), ema deskoñesidu tiru kilat tama rezidénsia  antigu Prezidente Repúblika no atuál Prezidente Partidu FRETILIN, Francisco Guterres “Lú-Olo” iha Farol, Díli.

Kilat-musan (bala real) ne’e fura husi kalen uma tun too kona meza nia vidru rahun hotu, besik loos tur fatin baibain eis-PR nian iha uma. Hafoin akontesimentu ne’e, seguransa pesoál eis-PR informa kedas ba Komando PNTL no F-FDTL, PCIC, Polisia Militár,  intelijénsia militár nian no polísia forensik too kedas uma rezidénsia hodi halo observasaun direta no halo investiga kona-bá faktu akontesimentu.

Jornalista: Vito Salvadór