Fevereiru, TL-RI Hahú Diskute Fronteira Marítima

Hatutan.com, (13 Janeiru 2025), Díli- Primeiru-Ministru (PM), Kay Rala Xanana Gusmão, Sabadu (11/01/2025), iha Postu Administrativu Natarbora, Munisípiu Manatuto, deklara katak iha fulan-Fevereiru, tinan ne’e, Timor-Leste (TL) ho Repúblika Indonézia (RI) hahú diskute asuntu fronteira marítima.

Lee Mós: Xanana Lansa Projetu Sízmiku Atu Identifika Riku-Soin Rai-Okos iha Kosta Súl

PM Xanana halo enkontru bilaterál ho Prezidente RI, Prabowo Subianto iha Jakarta, foin lalais ne’e. Foto/Média Gabinete Prezidente RI

Primeiru-Ministru (PM), Xanana Gusmão fó-sai asuntu ne’e iha ámbitu lansamentu projetu Sízmiku ka Lansamentu bá Café 2D Seismic Acquisition PSC TL-OT-21-17 ho objetivu atu hahú halo levantamentu bá riku-soin Timor-Leste (TL) nian hanesan mina no gás iha rai-okos, iha parte Kosta Súl área bloku Pualaca no fatin sira seluk tán.

“La lembra, karik iha fulan-Fevereiru 2025, ita komesa ona diskute ita-nia fronteira marítima ho Indonézia,” Xanana Gusmão hateten iha komunikadu ne’ebé Hatutan.com sita.

Xanana Gusmão informa objetivu dahuluk hosi diskusaun bá fronteira marítima ne’e atu defende soberania rai-laran, nune‘e ró ilegál sira labele mai hasai hotu ikan sira iha tasi Timor nian.

Xefe Governu la promete maibé sei haree posibilidade atu fó-hanoin malu katak, iha Beaço-Viqueque sei koloka Forsa Navál hosi FALINTIL-Forsa Defeza Timor-Leste (F-FDTL) nian atu evita peska ilegál ne‘ebé hasai ikan barak, estraga buat barak.

Xanana Gusmão konta katak, peska ilegál iha Tasi Timor nian mosu ona dezde funu-laran no funu na‘in sira deteta ona iha tempu ne’ebá.

“Bainhira ami la‘o hosi tasi ibun, ami hetan de‘it mak fo’er tanba ikan-ki’ik barak mak mate kauza hosi peska ilegál. Tanba sira hili de’it mak ikan-boot atu bá fa’an no ikan-ki’ik sira oho tiha no soe estraga mate hotu,” Xanana Gusmão haktuir.

Xefe Governu promete tenke monta duni Forsa Navál F-FDTL atu bele kontrola no proteje soberania Timor-Leste nian nune’e ema seluk labele estraga riku soin iha tasi laran.

Soberania ne’e katak, Timor-Leste iha kbiit rasik atu esplora no kontrola ninia rikusoin rasik la‘ós de‘it iha rai maran maibé mós iha tasi laran. Ne’e duni, husu nafatin bá Xefe suku no lia-na‘in sira tenke ko‘alia nafatin husu bá bei-ala sira atu ajuda nafatin nune’e prosesu diskusaun ne’e bele la’o ho susesu.

Jornalista: Vito Salvadór