Aero Dili Simu Sertifikadu Rejistu Aviaun Daruak Airbus A319

Hatutan.com, (16 Janeiru 2025), Díli–Kompañia aérea Timoroan nian ho bandeira Timor, Aero Dili, simu ho susesu sertifikadu rejistu ba aviaun daruak AirBus A319 iha sidade Xiaan-Xina, Kuarta (15/01/2025).

Lee Mós: Governu ho Autoridade RAEOA Agradese Aero Dili Fasilita Povu Atoni

Na’in b Aero Dili, Lourenço de Oliveira simu sertifikadu rejistu aviaun daruak Aero Dili Airbus A319 iha Xina. Foto/Espesiál

Serimónia asina rejistu hosi Xina nia ba Timor nia bandeira ne’e asiste mós hosi Embaixadór Timor Leste ba Xina,  Loro Horta. Ho sentidu katak Xina husik ona aviaun ne’e hodi Timor rejistu fali ho nia bandeira rasik hanesan mós aviaun dahuluk Aero Dili nian Airbus A320.

Hafoin ida-ne’e sei halo inspesaun jerál ba aviaun daruak Aero Dili nian ho tipu Airbus A319 rasik depois pinta tiha Bandeira Timor nian no iha tempu badak sei lori mai Timor-Leste.

Na’in ba Aero Dili, Lourenço de Oliveira ne’ebé Hatutan.com konfirma via telefónika, Kinta ne’e, hateten tuir planu ka oráriu kompañia Aero Dili nian aviaun daruak ne’e sei halo nia inaugural flight (penerbangan perdena) hosi Díli ba Xina iha loron 14 fulan-Fevereiru 2025.

“Ami halo mós esforsu no buka kumpre rekizitu balun tan tuir prosedimentu Aviasaun Sivíl Austrália nian atu tempu badak mós halo operasaun ba Austrália,” Lourenço de Oliveira hateten.

Durante tinan-20 liu, dezde Timor-Leste restaura nia independénsia iha 20 Maiu 2002, bele dehan seidauk iha aviaun Timoroan nian rasik ho bandeira Timor-Leste. Nune’e, Timoroan sira sempre utiliza aviaun komersiál empreza airline estranjeiru nian ne’ebé kuaze la halo ka la kontribui ba investimentu   infraestrutura inklui la iha investimentu ba kapasitasaun rekursu umanu timoroan sira.

Iha tinan-rua liubá aero Dili hahú investe lori ema estranjeiru mai hala’o operasaun, mas depois tinan-rua Aero Dili konsege forma ona aeromosa timoroan na’in-22 no pilotu timoroan na’in-tolu (3), tékniku na’in-tolu (3) no fasilita formasaun ba  pilotu ida (1) ho mekániku ida  (1) hosi governu nian.

“Ita iha esperansa boot hosi investimentu no kapasitasaun rekursu umanu timoroan sira ne’e atu iha tinan-lima mai timoroan mak sei halo operasaun rasik ba aviaun ita-nian ho ita nia orgullu rasik hanesan timoroan,” Lourenço de Oliveira hateten ho otimista boot.

Formasaun  ne’ebe mak Aero Dili  fasilita no investe ba timoroan  iha rai-laran no rai-li’ur (Eropa) la’ós baratu, inklui Aero Dili rasik selu peritu sira hosi rai-li’ur mai fó formasaun ba timoroan iha Aero Dili rasik ho mós timoroan sira ne’ebé hala’o knar Estadu nian iha Autoridade Aviasaun Sivíl Timor-Leste (AACTL).  

Kona-ba folin tikete  sei karun no kontinua kestiona hosi ema balu, Lourenço de Oliveira hateten molok ne’e tikete  folin karun prorvolta $300.00 vou dala-ida Dili-Denpasar, maibé ho prezensa Aero Dili nian tikete komesa baratu, katak labele liu hosu $300.00

Seluk fali, Aero Dili ho sentidu Estadu no patriotizmu  kontribuisaun fasilita vou Dili-Oé-Cuse ho folin tikete ne’ebé baratu purvolta $20.00-$30.00 vou dala ida ba pasajeiru ida. Daudaun ne’e Aero Dili halo vou Díli-Oécuse no Oé-Cuse-Dili, semana ida dala-rua iha loron Segunda dadeer ho Sesta lorokraik. 

Jornalista: Vito Salvadór