Saúde
Governu Orienta Ona Atu Halo Dijitalizasaun Bá Stock Ai-moruk
Hatutan.com, (20 Janeiru 2025), Díli— IX Governu Konstitusionál liu-hosi Vise Primeiru-Ministru no Ministru Koordenadór Assuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino orienta ona atu halo dijitalizasaun bá estoke ai-moruk iha Institutu Nasionál Farmásia no Produtus Médikus (INFPM) nune’e bele kontrola distribuisaun ho di’ak.
Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rural no Abitasaun Komunitária, Mariano Assanami Sabino. Foto/Tome da Silva.
Orientasaun ne’e hatún liga ho preokuoasaun públiku kona-bá estoke out ai-moruk iha postu saúde sira, Sentru Saúde Komunitária sira, inklui Hospitál Nasionál Guido Valadares (HNGV).
Lee Mós: Tau Barcode ba Ai-moruk sira no Monta CCTV iha INFPM
“Dijitalizasaun mak dalan úniku atu bele halo kontrolu, nune’e iha ona orientasaun bá parte relevante sira hodi hare kestaun ne’e atu ai-moruk hirak ne’e labele mosu fali iha klínika privadu,” Assanami hateten iha Ministériu Finansas, segunda (20/01/2025).
Ho dijitalizasaun bele hatene loloos kuantidade ai-moruk, espesifikasaun ai-moruk saida mak presiza liu, hatene mós ninia durasaun prazu, inklui tenke hatene didi’ak ami-moruk ne’e mai direta hosi fabrika no la’ós mai hosi distribuidór sira.
Ho dijitalizasaun, Governu liu-liu Ministériu relevante bele antisipa fatin rai ai-moruk, estoke ai-moruk, no nia prosesu distribuisaun.
“Foin daudaun ita aprova ona Dekreto Governu, nune’e sei regula apoteker ka klínika sira iha foho, ita hare didi’ak kondisaun tuir padraun ne’ebé aprovadu hosi Konsellu Ministru,” nia hateten.
Tanba ne’e nia husu ema hotu-hotu atu kontribui hodi tau matan bá asuntu saúde liu-liu enfermeira, doutór ho médiku sira.
Governu mós orienta ona Komisaun Funsaun Públika (KFP) atu haree rejime spesiál bá karreira ne’ebé aprova iha tinan 2012 no halo revizaun iha tinan 2022 seidauk implementa kona-bá oinsá médiku sira ne’ebé servisu iha área rurál, sira-nia promosaun profisaun seidauk profesionaliza didi’ak.
Jornalista: Leopoldina de Carvalho