MAFPP Hasai Sirkulár “Hapara” Ajente Administrasaun Públika Liu Na’in-300

Hatutan.com, (20 Janeiru 2025), Díli– Molok tama Natal, 25 Dezembru 2024 ho tinan foun 01 Janeiru 2025, Gabinete Ministru Agrikultura Floresta, Peska no  Pekuária (MAFPP), Marcos da Cruz,  hasai sirkulár ida kona-bá la renova ka la halo estensaun kontratu ba funsionáriu termu sertu sira, funsionáriu kazuál, inklui mós funsionáriu ajente administrasaun publika sira.

Sikulár ne’ebé hasai hosi Gabinete Ministru Marcos da Cruz hodi la estende kontratu servisu funsionáriu kazuál ho ajente administrasuan públika sira liu ema na’in-300. Foto/Repro

Funsionáriu ajente administrasaun públika liu ema 300 ne’ebé hala’o knar iha diresaun sira hotu ne’ebé tutela ba MAFPP la tama ona servisu, inklui inspetór sira iha ho esperiénsia balun liu tinan-10 iha Diresaun Nasionál Kauerentena no Bio-seguransa  (Direção Nacional de Quarentena e Biossegurança) iha Postu Fronteira sira la hala’o ona sira-nia knaar.

Inspetór sira Diresaun Nasionál Kuarentena no Bio-Seguransa nian ne’ebédurante ne’e destaka iha postu fronteira Batugade, Postu Vijilánsia Tunubibi-Maliana, Postu Salelle, Postu Com-Lopalos, Postu Laga-Baucau, Aeroportu Díli no postu Portu Tibar, Postu Oé-Cusse, Postu Sakato, Postu  Oecilo, Postu Pasabe, Postu  Citrana, ho Aeroportu Oé-Cusse,

 la hala’o ona sira-nia knaar dezde tama tinan foun 2025 to’o agora.

Iha informasaun oioin ne’ebé sirkula iha MAFPP katak funsionáriu ajente administrasaun publika sira ne’e balun haruka submete fali ona sira-nia kurríkulu vitae (CV, sigla portugés) hodi hein desizaun hosi Ministru Agrikultura Floresta, Peska no  Pekuária (MAFPP), Marcos da Cruz, no balun fali dehan katak vaga sira-ne’e mamuuk atu prepara ba prienxe funsionáriu foun sira ne’ebé rekomenda hosi estrutura partidu (la indika ba partidu ne’ebé) hosi nivel baze to’o nasionál.

Ba informasaun sira-ne’e, Hatutan.com, Segunda (20/01/2025), halo konfirmasaun ho Ministru Agrikultura Floresta, Peska no  Pekuária (MAFPP), Marcos da Cruz  hateten, desizaun ne’ebé nia foti difine iha artigu 46 hosi Dekretu-Lei Nú.34/2008, loron 27 fulan-Agostu, ne’ebé altera hosi Dekretu-Lei Nú.22/2011, loron 08 fulan-Juñu relasiona ho rejime konkursu, rekrutamentu, selesaun no promosaun ba pesoál administrasaun públika.

“Kontratadu inklui kazuál ho ajente ne’e lei mak define, ne’e-duni sira nian kontratu uluk asina iha tinan uluk to’o loron 31 fulan-Dezembru 2024 kontratu hotu ka mate ona, ita tenke kumpre kontratu, ne’ebé la’ós ha’u mak hasai ka hapara, maibé lei mak hasai, lei mak dehan ita kumpre de’it servisu la’o tuir lei,”  Ministru MAFPP Marcos da Cruz hateten hodi responde Hatutan.com  iha Edifísiu Ministériu Finansa, Díli.

Nia esklarese katak MAFPP sei haree fali oinsá mak haree servisu sira ne’e ho di’ak hanesan Primeiru Ministru dehan “the right person on the right place”. Tanba ne’e, MAFPPpresiza ema ne’ebé iha koñesimentu tékniku hodi ezerse sira-nia funsaun hodi fasilita apoiu servisu iha kampu.

Husu kona-ba pesoál na’in-hira mak tenke sofre hosi sirkulár la extende kontratu ba kazuál no funsionáriu ajente administrasaun públika nian ne’e, Ministru Marcos da Cruz  konfesa katak nia   la lembra númeru kontratadu sira ne’ebé remata ona sira-nia kontratu iha loron 31 fulan-Dezembru 2024, maibé depois mak sei haree fila-fali oinsá mak atu halo servisu bá oin.

MAFPP rasik iha planu atu halo fali konkursu, maibé MAFPP sei haree ema ne’ebé iha abilidade di’ak hodi bele ajuda servisu MAFPP.

Ministru Marcos da Cruz hatutan maske ajente no inspetór  nian kontratu remata ona, maibé  laiha difikuldade iha servisu no atendimentu sira loron-loron nian.

Jornalista Estajiária: Zita Menezes