Timor-Leste Kongratula Malázia Ne’ebé Sei Lidera Prezidénsia ASEAN

Hatutan.com, (20 Janeiru 2025), Díli- Ministru Negósiu Estranjeiru no Kooperasaun (MNEK), Bendito dos Santos Freitas, hodi Governu Timor-Leste nia naran kongratula Governu Malázia ne’ebé sei lidera Prezidénsia ASEAN durante tinan 2025.

Lee Mós: MNE Sira Membru ASEAN Fó Apoiu Tomak Adezaun Timor-Leste iha 2025

MNEK Bendito dos Santos Freitas partisipa iha retiru MNE-ASEAN husi loron 18-19 fulan-Janeiru, tinan ne’e, iha Lankawi, Malázia. Foto/MNEK

Ministru Negósiu Estranjeiru no Kooperasaun, Bendito dos Santos Freitas hato’o deklarasaun ne’e bainhira partisipa iha retiru Ministru Negósiu Estranjeiru ASEAN (MNE-ASEAN) husi loron 18-19 fulan-Janeiru, tinan ne’e, iha Lankawi, Malázia.

Retiru MNE-ASEAN ne’ebé hala’o iha Sentru Konvensaun Internasionál Langkawi (LICC) Malázia ne’e, Timor-Leste partisipa hanesan observadór.

Reuniaun ne’ebé lidera husi Ministru Negósiu Estranjeiru Malázia, Honorável Dato’ Seri Utama Haji Mohamad bin Haji Hasan, estadu-membru sira diskute prioridade sira ASEAN nian, inklui relasaun externa sira ASEAN nian ho ninia sentralidade ba evolusaun arkitetura rejionál.

Ministru Negósiu Estranjeiru sira mós iha oportunidade atu troka hanoin kona-bá asuntu rejionál no internasionál sira ne’ebé interesadu no mós sai preokupasaun komún.

Liuhosi komunikadu imprensa ne’ebé Hatutan.com asesu, Segunda (20/01/2025),  Ministru Bendito Freitas, subliña Timor-Leste apoia tomak ba Malázia nia Prezidénsia ho tema “Inkluzividade no Sustentabilidade” ho fi’ar metin katak, durante Prezidénsia Malázia nian, sei halo rejiaun ne’e preparadu liután ho konfiansa hakat ba futuru ida ne’ebé ekonomikamente integradu, sustentável no reziliente hodi hasoru situasaun globál ho nia dezafiu sira.

Timor-Leste mós agradese ba Estadu-membru ASEAN sira ne’ebé mak fó ona apoiu kontínuu no la nakdoko ba Timor-Leste nia adezaun tomak ba organizasaun rejionál ne’e, no hato’o liután Timor-Leste nia prontidaun atu konklui prosesu adezaun nian.

Timor-Leste hakarak tebes atu kontribui ba inisiativa rejionál sira ne’ebé aposta ba hametin pás, seguransa no kreximentu sustentável no hamriik metin ho ASEAN nia vizaun kompartida kona-ba komunidade ida ne’ebé bazeia ba regra no seluk tan.

Jornalista: Vito Salvadór