CI-ANC Estabelese Kooperasaun Hodi Haforsa Servisu Meius Komunikasaun Sosiál iha TL

Hatutan.com, (22 Janeiru 2025), Díli—Conselho Imprensa (CI) ho Autoridade Nacional Comunicação (ANC) estabelese kooperasaun lima (5) hodi hametin liu tán servisu meius komunikasaun sira iha Timor-Leste (TL).

Serimónia asinatura MoU entre autoridade sira hosi Conselho Imprensa (CI) no Autoridade Nacional Comunicação (ANC) iha Kintal boot, kuarta (22/01/2025). Foto: Lázaro Pereira Quefi.

Prezidente CI, Otelio Ote konsidera asinatura Memorandu of Undersanding (MoU) ne’e importante atu haburas no hametin servisu hotu-hotu iha área Komunikasaun sosiál.

Lee Mós: CI ho PNTL Renova Akordu Kooperasaun hodi Garante Liberdade Imprensa

CI konsidera ANC iha kompeténsia atu fó lisensa bá frekuénsia Radio no Televizaun sira ne’ebé hakarak eziste iha territóriu Timor-Leste

“Ita-nia esperansa durante tinan lima maka atu lori mudansa ruma iha asuntu komunikasaun sosiál” Otelio Ote hateten iha Salaun enkontru CI Kintal Boot Díli, kuarta (22/01/2025).

Iha fatin hanesan Prezidente ANC, Flávio Cardoso Neves hato’o pontu vista tolu, primeiru maka nota entendimentu ne’e kleur ona tanba ida-ne’e atu bele fasilita liu-tán servisu entre instituisaun rua ne’e, hodi dudu meius komunikasaun sosiál iha Timor-Leste bá oin ho seguru.

Segundu maka, ida ne’e hanesan pasu importante atu instituisaun rua ne’e maski iha kanál no papél diferensa maibe iha buat ruma mós importante atu bele halo servisu hamutuk.

Terseiru maka iha nota entendimentu ida-ne’e hanesan inísiu ida atu bele haloos servisu ida di’ak liu tán iha futuru.

ANC sei halo koordenasaun ho CI atu kualkér sidadaun mak iha hanoin atu estabelese radio no Televizaun tenki rejista uluk iha CI antes atu hetan frekuénsia ne’ebé atu utiliza.

Jornalista Estajiáriu:  Lázaro Pereira Quefi