IOM Sei Involve Ramos-Horta iha Jestaun Fluxu Migrasaun

Hatutan.com, (23 Janeiru 2025), Díli—Diretora Jerál Organizasaun Internasionál bá Migrasaun (IOM, sigla Ingles) Amy Pope hateten, ba oin sei involve Prezidente Repúblika, José Ramos-Horta iha diskusaun sira kona-bá kestaun globál ne’ebé afeta jestaun fluxu migrasaun nian.

Prezidente Repúblika José Ramos-Horta konversa ho Diretora Jerál Organizasaun Internasionál ba Migrasaun (IOM, sigla Inglesh), Amy Pope iha Fórum Ekonómiku Mundiál Davos-Suisa. Foto: Média PR.

Diretora Jerál Organizasaun Internasionál ba Migrasaun (IOM, sigla Ingles) Amy Pope hato’o deklarasaun ne’e iha nia enkontru informal ho Prezidente Repúblika José Ramos-Horta iha Davos, Suisa, Tersa (21/01/2025) Iha Fórum Ekonómiku Mundiál.

Lee Mós: Reinu Unidu Kontinua Apoia TL

“Enkontru ne’e destaka no subliña oportunidade folin-boot atu envolve ho Prezidente Ramos-Horta iha diskusaun sira kona-ba kestaun globál sira ne’ebé afeta jestaun fluxu migrasaun nian,” Amy Pope hateten iha komunikadu.

Sorumutu entre Prezidente Repúblika José Ramos-Horta no Amy Pope nu’udár enkontru da-ruak entre líder na’in rua, hafoin sira-nia enkontru dahuluk iha Nova Iorke iha loron 21 fulan-setembru tinan 2023, durante Sesaun ba dala 78 hosi Asembleia Jerál Nasoins Unidas nian (UNGA). Iha tempu ne’ebá, Pope maka Diretora Jerál eleitu, prepara atu asume ofisialmente nia kargu iha outubru 2023.

Diálogu kontinuasaun iha Fórum Ekonómiku Mundiál ne’e hatudu kompromisu ne’ebé la’o hela atu rezolve dezafiu sira migrasaun globál nian liu hosi envolvimentu diplomátiku nivel aas.

Jornalista: Vito Salvadór