Komisaun B ho MD Diskute Halo Revizaun Bá Lei Prezedénsia Protokolu Estadu

Hatutan.com, (23 Janeiru 2025), Díli-Ministru Defeza, Donaciano Costa Gomes “Pedro Klmar Fuik”, Kinta (23/01/2025), halo audiénsia públiku ho komisaun B Parlamentu Nasionál ne’ebé Trata Asuntu Negósiu Estranjeiru no Defeza Seguransa hodi halo diskusaun bá lei prezedénsia protokolu estadu atu bele halo fali  revizaun tuir kestaun ne’ebé mak Ministériu Defeza  koloka  ona.

Lee Mós: Prezidente Repúblika Husu Ministériu Defeza Kontínua Tau Matan bá Sustentabilidade F-FDTL

Ministru Defeza (MD), Donaciano do Rosário da Costa Gomes “Pedro Klamar Fuik”.

Ministru Defeza Donaciano Costa Gomes “Pedro Klmar Fuik” hateten, naturalmente lei ida-ne’e tuir realidade ne’ebé iha no tuir pontu de vista komandu FALINTIL-Forsa Defeza Timor-Leste (F-FDTL)  no Ministériu Defeza presiza atu bele haree fila-fali depois bele halo enkuadramentu ne’ebé mak di’ak liu.

“Ami propoin para haree fila-fali lei ida-ne’e tanba posibilidade bele halo revizaun, maibé sujestaun husi Parlamentu Nasionál Komisaun B nian hateten katák ministériu relevante mak Ministériu Defeza sei aprezenta proposta lei bá Konsellu Ministru para aprezenta pasa bele sai fali proposta revizaun lei,”  Ministru Donaciano Costa Gomes “Pedro Klmar Fuik” bá Jornalista sira hafoin halo audiénsia ho komisaun B-PN.

Ministru Defeza Donaciano Costa Gomes “Pedro Klmar Fuik” afirma iha proposta no hanoin ne’ebé mak Ministériu Defeza  koloká lei ida-ne’e bele valoriza oinsá mak iha orden prezedénsia ne’e bele koloká militár sira hanesan eis titulár, eis komandante  ka Jenerál sira, komandante komponente sira bele hetan fatin tuir orden prezedénsia ne’ebé mak adekuada.

“Lei númeru 4/2024 lei naran lei prezedénsia protokolu estadu, tantu diskusaun ne’ebé mak ohin ami ko’alia kle’an kona-bá seguransa lei ne’e rasik foin mak aprova iha fulan-Jullu 2024 entaun presiza tempu balu hodi tama iha  vigór mak depois foin bele iha proposta revizaun,” Ministru Defeza ne’e tenik.

Definisaun husi Lei ida-ne’e mak oinsá regula atividade serimónia importante ida no bele koloká estruturadu fatin bá Prezidente Repúblika, Prezidente Parlamentu Nasionál, Primeiru Ministru, Prezidente Tribunál Rekursu,   eis titulár sira no bainaka importante sira ho estruturadu tuir lei protokolu estadu.

Jornalista Estajiária : Zita Menezes