20–27 Janeiru, CNOPC- APC Rejistu Tipu Kazu Dezastre Haat Ne’ebé Afeta Uma-Kain 12

Hatutan.com, (27 Janeiru 2025), Díli- Durante semana ida ikus, fulan-Janeiru hosi loron 20 to’o loron 27, Sentru Nasionál Opresaun Protesaun Sivíl – Autoridade Protesaun Sivíl (CNOPC-APC) rejistu kazu dezastre ahi-han uma ida (1), anin-boot sobu uma hitu (7), rai-halai rezulta uma haat (4) hetan estragu no Asidente Tráfiku tolu (3).

Lee Mós: Vítima Inséndiu iha Aldeia Buki Simu Materiál Konstrusaun hosi APC Selu Rasik Transporte Lori Bá Uma

Diretór Gabinete Relasaun Esterna no Komunikasaun Autoridade Protesaun Sivíl (APC), Cesario da Silva Marques. Foto/Vito Salvadór

Diretór Gabinete Relasaun Esterna no Komunikasaun Autoridade Protesaun Sivíl (APC), Cesario da Silva Marques, informa hosi dezastre ne’ebé akontese, iha sia mak prienxe rekizitu no haat mak hetan apoiu emerjénsia de’it, no husi númeru ne’ebé iha ekipa CNOPC-APC evakua direita uma-kain  lima (5) ba fatin seguru no fó apoiu emerjénsia direita.

“Komandu APC Munisípiu ho Parseiru Relevante sira fornese kedas asisténsia emerjénsia ba família afetadu sira hanesan ai-han no la’ós ai-han (food item & Non-food Item) no lori sira ba fatin seguru hodi asegura sira nia vida,”  Cesario da Silva Marques ba jornalista sira liuhosi konferénsia ba imprensa ne’ebé halo iha edifísiu APC, Caicoli, Díli, Segunda (27/01/2025).

Cesário hatutan Operasional Autoridade Protesaun Sivíl (APC) Munisípiu sira sei kontinua halo hela levantamentu detallu kona-bá sasán ne’ebe estragu no lakon.

Munisípiu sira ne’ebé afeita ba dezastre naturál iha semana ikus ne’e mak hanesan Munisípiu Ainaro, asidente Tráfiku ema na’in-tolu (3) mak kanek, Munisípiu Bobonaro akontese anin sobu uma  ida (1), Rai-halai sobu uma ida (1), Munisípiu Dili akontese anin-sobu uma rua (2), rai-halai sobu tolu (3), Munisípiu Ermera akontese anin sobu uma-ida (1), rai-halai sobu uma-ida (1), Munisípiu Lauten mós anin-sobu uma-ida (1), Munisípiu Manufahi akontese anin-sobu uma ida (1) ho Munisípiu Viqueque  mós anin-sobu uma-ida (1).

Jornalista: Vito Salvadór