Polísia Identifika Timoroan Ida Ne’ebé Uza Kilat ho Pistola

Hatutan.com, (30 Janeiru 2025), Díli-Polísia Nasionál Timor-Leste (PNTL) liuhosi Departamentu Investigasaun Kriminál, Kinta (30/01/2025), tuku 09.00 dadeer, identifika sidadaun Timoroan ida ho inisiál JPP hodi presta deklarasaun tanba nia partilla nia foto iha konta WhatsApp kaer hela kilat no pistola.

Lee Mós: Tribunál Suai Aplika TIR ba Sidadaun Lori Kilat-Musan Ultrapasa Postu Fronteira Batugade

Timoroan ho inisiál JPP ne’ebé polísia indentifika tanba kaer kilat ho pistola. Foto ne’e ikus mai viral iha media sosiál Facebook. Foto/Repro.Espesiál

Foto ne’e ikus mai ema balu screen shoot tiha hodi partilla fali iha media sosiál Facebook no konsege viral hodi halo parte seguransa nota no identifika JPP atu bele fó deklarasaun kona-bá auténtiku foto ne’ebé kaer hela pistola no kilat.

Presta tiha deklarasaun iha DIK, sidadaun Timoroan ho inisiál JPP haktuir ba jornalista sira katak pistola ho kilat ne’ebé nia kaer ne’e bainhira nia ho nia kaben ba halo kompras iha Lippo Mall iha Kuta-Bali. Iha ne’ebá, ema barak forma atu ba haree kilat ho pistola  ne’ebé ema tau hela iha Lippo Mall nia laran hodi bele koko no hasai foto.

“Kona-bá informasaun ne’ebé espalla halo para atu estraga ha’u nia naran iha situasaun sira. Foto ne’e iha Bali iha  Lippo Mall. Foin lalais, ha’u ho ha’u nia ferik-oan pasa ferias iha Bali mak ami la’o halimar ba Lippo Mall hodi hola roupa. Ami na’in-rua la’o hela haree ema forma barak entaun ha’u mós gosta maibé kilat nia modelu ema haree ne’e hanesan kilat tebes, mas lae. Kilat ne’ebe ha’u utiliza ne’e la’ós kilat tebes, maibé kilat ne’e nia musan masa,” JPP informa.

“Foto ne’e ha’u posting iha WhatsApp de’it mas momentu se iha Bali, mas tanba ita iha kolega barak entaun ema foti foto sira ne’e espalla tiha iha Facebook. Ha’u iha faktu hanesan pasa porte, ha’u sai, ha’u nia foto barak iha ne’ebá sai momoos loos kona-bá loron saida no oras saida,”  JPP hateten tan.

Nia fo sasin katak iha Lippo Mall baibain ema halo viajen ba ne’e ema tama selu hodi tiru halimar tanba ne’e kilat masa la’ós kilat tebes.

Jornalista Estajiáriu: Lazaro Pereira Quefi