Veteranu no Kombatente Covalima Divulga Aktu Esplozaun no Korrupsaun iha Prosesu Verifikasaun Lista Veteranu

Hatutan.com, (01 Fevereiru 2025), Díli—Veteranu no Kombatente liberasaun nasionál Munisípiu Covalima hamutuk ema na’in-13, Sábadu (01/02/2025), liuhosi konferénsia imprensa iha Covalima, divulga aktu esplorasaun no korrupsaun ne’ebé deskonfia komete hosi pesoál ida ho inisiál FDS nu’udár elementu prinsipál iha Konsellu Kombatente Libertasaun Nasionál (CCLN, sigla portugés) Munisípiu Covalima.

Lee Mós: MACLN Enkoraja Veteranu Sira no Públiku Submete Reklamasaun ba CCLN Kada Munisípiu

Veteranu no kombatenti libertasaun nasionál sira hosi MUnisípiu Covalima halo konférensia imprensa, Sábadu (01/02/2025). Foto/supply

Liuhosi konferénsia imprensa ne’e, Agustinha do Carmo “  Bui  Ki’ak Tekite” nuu’dár portavós ba hirak ne’ebé konsidera hanesan vitima ba aktu esplorasaun no korrupsaun hosi FDS ne’e deklara,  bainhira sira hakat ba komisaun verifikasaun dadus hodi tuir prosesu verifikasaun ba veteranu ne’ebé Estadu prepara iha munisípiu ida-idak. Maibé, iha prosesu verifikasaun dadus, FDS  halo esplorasaun hasoru sira durante prosesu verifikasaun iha Munisípiu Covalima.

Iha prosesu verifikasaun dadus, FDS  halo promesa oioin ba sira, no mós husu sira kontribui osan (hosi $5.00 to’o $1000.00), materiál sira (fós, semente, korrente-mean, tais) no animál sira (karau, bibi, fahi, manu) inklui halo servisu  obrigatóriu ba konstroi FDS nia uma.

Vitima sira ne’e haktuir osan ho sasán hirak-ne’e FDS  haruka nia liman-ain ka saseluk sira husu hodi fumenta katak, se la fó maka naran veteranu ne’ebe sira rejistu sei la sai hateten tan katak  se hakarak naran sai ho partisipasaun luta 8 a 14 entaun tenke oferese osan, animál, materiál sira inklui halo FDS nia uma.

Vitima Candida Barros “Bi Ki’ak”  haktuir nia oferese osan $40.00, tais ida, bibi-aman ida, foos saku ida, semente saku ida, inklui hatama $5.00 dalaruma $10.00 ba FDS hodi halo festa;

Vitima Domingas Amaral “Bi Doben”, oferese osan $25.00, tais ida, semente saku ida, foos saku ida, manu-aman ida, no iha tinan-2023 bosok dehan naran iha lista laiha nune’e husu tan osan $100.00.

Vitima Lourença Barros deklara nia  oferese osan $25.00, tais-mane ida, foos saku ida, semente saku ida, no halo tan kobransa montante osan $10.00 dala tolu no kobransa $20.00 dala ida.

Vitima seluk mak Domingos do Carmo “Moruk” oferese osan $200.00 ne’ebé fasilita FDS nia ferik-oan ba Betun- Indonézia, no bainhira atu halo verifikasaun dadus husu tan osan $100.00 ho tais ida, sigarru L.A slop rua (hola fó bainaka durante inaugurasaun Aeroportu Suai);

Vitima Antonia Cardoso “Bi Bete” haktuir nia  oferese osan $200. 00 (no oferese ba dala-rua osan  $500.00, Bee Aqua kaixa-10, Dellos kaixa-lima (5), Sprite Kaixa-20 no karau ida, uza hodi halo FDS nia oan nia festa tinan (aniversáriu);

Leopoldo Soares “La Terus” nu’udár mós vitima deklara nia oferese osan $25.00, tais-mane rua, manu-aman boot ida no semente saku ida.

Julieta Madeira A. Lay  deklara nia oferese osan $25.00, tais-mane ida no semente saku ida.

Agustinha do Carmo “    Bui  Ki’ak Tekite” oferese osan $25.00, foos saku ida no semente saku ida;

Terezinha Barros “Bi Mesak” oferese osan $25.00, tais ida, semente saku ida, no bainhira halo festa sempre husu osan, dalaruma dolar 5.00 to’o dolar 10.00;

Izabel de Araujo “Ran Fakar” oferese osan $25.00, tais-mane ida, manu-aman boot ida, fahi-aman boot ida, korrente osan-mean 20 gram ida, semente saku ida no fos saku ida;

Anita Amaral “Rafu” oferese osan $ 10.00, tais-mane ida ho folin $25.00, no entrega tan $50.00, manu aman boot ida, foos saku ida no kada festa sempre husu osan, dalaruma $5.00 to’o $10.00;

Madalena da Resureição oferese $25.00, tais-mane ida, fos saku ida, manu-aman boot ida no semente saku ida;

Leonardo do Carmo “Ran  Moruk” oferese osan $25.00, bibi-aman ida, tais ida, semente saku ida no foos saku ida;

Ho hahalok FDS nian ne’e, parte sira ne’ebé halo konferénsia imprensa ne’e  konsidera pesoál FDS la’ós de’it viola ema nia luta ba prosesu libertasaun nasionál, maibé FDS  hafo’er espíritu, prinsípiu veteranu no mós viola lei ne’ebé vigora iha Timor-Leste. Ho nune’e, parte sira ne’ebé konsidera aan hanesan vitima ba aktu FDS nian ne’e ezije ba:  

1. Komisaun Anti-Korrupsaun no Ministériu Públiku atu halo investigasaun ba aktu ne’ebé FDS halo no prosesa tuir dalan legál ne’ebé mak vigora iha estadu ida-ne’e;
2. Ministériu Asuntu Kombatente Libertasaun Nasionál no Konsellu Libertasaun Nasionál atu halo re-verifikasaun ba naran hirak mak publika ona, hodi haree fali ho serteza katak hirak-ne’ebé naran publika ona la’ós rezultadu hosi subornu no aktu explorativu sira;
3. Ministériu Asuntu Kombatente Libertasaun Nasionál no Konsellu Kombatente Libertasaun Nasionál hodi foti sansaun rigorozu ba aktu ne’ebé FDS halo inklui halo suspensaun ba nia pozisaun atuál nu’udar Komisáriu CCLN Munisípiu Covalima ba Konsellu Kombatente Libertasaun Nasionál hodi hein investigasaun ne’ebe kle’an, luan no transparente.

Sira hirak ne’ebé sarna lia ba prosesu ne’ebé sira konsidera nakonu ho manipulasaun, esplorasaun no korrupsaun ne’e mak hanesan;  Candida Barros “Bi Ki’ak”, Domingas Amaral “Bi Doben”, Lorença Barros, Domingos do Carmo “Moruk”, Antonia Cardoso “Bi Bete”, Leopoldo Soares “La Terus”, Julieta Madeira A. Lay , Agustinha do Carmo “    Bui  Ki’ak Tekite”,  Terezinha Barros “Bi Mesak, ” Izabel de Araujo “Ran Fakar”, Anita Amaral “Rafu”, Madalena da Resureição ho Leonardo do Carmo “Ran  Moruk”.

To’o notísia ne’e publika seidauk hetan konfirmasaun hosi parte FDS inklui responsabilidade CCLN Munisípiu Covalima ho MACLN Covalima rasik.

Jornalista Estajiáriu:  Lazaro Pereira Quefi