Tribunál Rekursu Halo Pedidu Ona bá PN ho Governu Husu Auditória Mas La Akontese

Hatutan.com, (05 Fevereiru 2025), Díli-Tribunál Rekursu (TR) submete beibeik ona pedidu ba Parlamentu Nasionál (PN) ho Governu atu bele iha auditoria maibé to’o agora seidauk akontese.

Lee Mós: FRETILIN Fó Hanoin Governu Servisu ho Tranparánsia no CNRT Propoin Halo Auditoria ba Tribunál

Prezidente Tribunál Rekursu, Deolindo dos Santos. Foto/Zita Menezes

Hatán bá proposta hosi membru Parlamentu Nasionál hosi Bankada CNRT, Virginia Anabela, atu halo auditoria mós ba Tribunál Rekursu tanba ezekuta mós orsamentu estadu kada tinan, Prezidenti Tribunál Rekursu (PTR), Deolindo dos Santos, responde katak Tribunál Rekursu disponivél atu hetan  auditória, tanba antes ne’e, PTR rasik mak halo pedidu bá Parlamentu Nasionál no Governu maibé seidauk akontese.

“Ida-ne’e ha’u lakohi atu fó komentáriu bei-beik ona tanba saida, ha’u nia  pedidu ne’e uluk mai Parlamentu Nasionál, buat ne’e ha’u halo hotu ona mais buat ne’e la akontese, tanba  ha’u halo hotu pedidu ne’e mais la  akontese. Ne’ebé atu la’o ka la’o  ne’e la’ós ha’u nia problema,” PTR Deolindo dos Santos bá Jornalista sira hafoin halo enkontru ho Komisaun A-PN iha PN, Kuarta (05/02/2025).

Nia hatutan atu aprová orsamentu la’ós kabe kompeténsia konsellu no tribunál nian, mais ne’e kompeténsia Parlamentu Nasionál no Governu nian sé sira la aprová Tribunál Rekursu la halo buat ida.

“Ha’u disponivél dala ida tán dezde inisiu to’o agora, tanba pelemenus ha’u bele sura katák iha tribunál ami halo hanesan ne’e, dala ida tán iha tribunál ami la halo ajeineiras, kuandu bainhira ita halo buat sira ne’e para instituisaun seluk kumpri nia obrigasaun legál, ita mós tenke halo detallu formal para kumpre ita nia obrigasaun legál,” Deolindo dos Santos afirma.

 PTR Propoin Fó Subsidiu Transporte Bá Juís No Juíz La Presiza Iha Kareta Estadu

Prezidenti Tribunal Rekursu, Deolindo dos Santos propoin atu fó subsidiu transporte de’it bá juíz sira no juíz sira la presiza iha tán  karreta estadu.

Prezidenti Tribunal Rekursu Deolindo dos Santos hateten, kona-bá karreta ne’ebé mak agora sai virál mós iha mídia sosiál kona-bá pesoál tribunál  uza karreta estadu hodi treinu bá oan ne’e, uluk kuandu iha nia inisiu  mandatu iha tinan 2021 iha diskusaun kona-bá estatutu PTR bá kedan ho pareser  atu halo alterasaun mós bá ida-ne’e, atu evita problema.

“Depois atu evita problema sira hanesan mosu daudaun ne’e, ha’u husu atu atribui subsidiu tranporte ruma bá juíz sira no juís sira la presiza atu  iha tan karreta,” PTR Deolindo dos Santos hateten.

Prezidenti Tribunal Rekursu  ne’e afirma durante ne’e despeza estadu nian ne’ebé ho osan  millaun bá karreta estadu nian tomak inklui mós tribunál atu halo manutensaun de’it fó bokur bá impreza sira ne’ebé oferese karreta mai no fó bokur bá ofisina sira ne’ebé halo manutensaun bá karreta estadu nian.

Antes ne’e iha Plenária Parlamentu Nasionál, Segunda 03 fulan-Fevereiru 2025, Deputada Bankada FRETILIN Lidia Norberta husu atu halo investigasaun bá karreta sira ne’ebé mak pesoál tribunál nian uza hodi bá fó treinu bá nia oan,

Deputada Lidia Norberta husu Komisaun Anti-Korrupsaun (CAC) haree preokupasaun Deputadu sira no públiku sira nian  relasiona ho karreta estadu ne’ebé virál iha mídia sosiál.

Jornalista Estájiaria: Zita Menezes