Governu Kansela Halo Jardin iha Sengol

Hatutan.com, (06 Fevereiru 2025), Dili—Espasu públiku ne’ebé rezulta husi aviksaun obrigatóriu iha área Sengol-Bidau  nian to’o Kuluhun, Díli, ne’ebé antes ne’e atu halo jardín la konsege ona ka kansela tanba Governu  sei konstrui estrada ho pista rua (2) to’o iha Becora.

Lee Mós: Espasu Ne’ebé SEATOU Sobu Sei Halo Jardín

Ministru Obras Públika (MOP), Samuel Marçal. Foto/dok.Média MOP.

Ministru Obras Publika (MOP), Samuel Marçal, haktuir antes ne’e dezeñu ba jardin kompletu ona, maibe tanba atu minimiza engarrafamentu trafiku, nune’e governu iha planu ida atu loke estrada pista rua.

“Rota  foun ba Becora loke halo luan, se ita loke luan husi Becora maka ita la loke tun to’o mai Bidau-Sengol ne’e sei afeta nafatin ba engarrafamentu trafiku,” Ministru Samuel Marçal haktuir ba jornalista sira iha Palásiu Governu, Kuarta (05/02/2025)

Governu mós sei koalia ho operadór telekomunikasaun tolu; Timor Telecom, Telkomcel ho Telemor, atu   fiu fibra optika ne’e tau hotu ba rai, nune’e labele estraga imajem sidade Díli.

Kona-bá alargamentu estrada husi Kuluhun ba to’o Hera, hahú ona  ho levantamentu dadus ba komunidade sira, balun sira komesa hatama ona numeru konta bankaria, balun sei kompleta dokumentu, nune’e agora sei ba indeminizasaun bainhira balun dokumentus kompletu sei hahú prosesu pagamentu

Samuel Marçal esklarese prosesu ne’e la’ós loron ida ka rua, maibe nia parte  agradese tebes tanba komunidade sira iha ona kolaborasaun di’ak hodi kontribui ba dezenvolvimentu.

Kona ba orsamentu ba estrada pista rua hosi Bidau-Sengol to’o ba Becora daudaun ne’e sei iha parte verifikasaun atu nune’e bele hatene lolos kustu orsamentu ba konstrusaun.

Jornalista : Leopoldina de Carvalho