Sidadaun Ida Lori Pistola Brinkedu Ameasa Loja Na’in Husu Osan

Hatutan.com, (07 Fevereiru 2025), Díli- Sidadaun ida uza pistola brinkedu  ka pistola masa ameasa loja na’in hodi husu osan.

Komandante Jerál Polísia Nasionál Timor-Leste (PNTL), Komisáriu Jerál Henrique da Costa. Foto/Elio dos Santos da Costa

Loja na’in  foti inisiativa  hadau hikas pistola falsu ne’e no informa ba Polísia Nasionál Timor-Leste (PNTL). Kazu ne’e akontese iha loron rua liubá iha Postu Administrativu Na’in Feto, Munisipiu Díli.

“Hahalok ida ne’e suspeitu halo beibeik ona. Uluk nia husu osan ba loja na’in nia foti fó de’it mas ida horibainrua ne’e tanba nia ba ho pistola brinkedu ida ameasa tan loja na’in entaun loja na’in dehan ida ne’e mak ha’u la foti medida ruma buatamak ne’e bele tiru ha’u. Iha ikus loja na’in foti medida hasoru nia hadau tiha pistola no informa ba Polísia depois Polísia ba halo atuasaun no identifika katak pistola brinkedu,”   Komandante Jerál Polísia Nasionál Timor-Leste (PNTL), Komisáriu Jerál Henrique da Costa hateten ba jornalista sira iha edifísiu Unidade Polísia Marítima,  Díli, Sesta (07/02/2025).

Situasaun agora ne’e ema uza brinkedu hodi hata’uk ema depois to’o ikus dehan ne’e membru Polísia ka Forsa ida mak halo asaun sira hanesan ne’e.

Komisáriu Jerál Herndrique da Costa husu ba komunidade hotu karik haree ema ruma uza brinkedu hodi ameasa ema ka hata’uk ema ruma  informa lalais ba Polísia hodi foti medida ruma.

Jornalista Estajiáriu : Lazaro Pereira Quefi