Eletrisidade Mate-Lakan, Membru PN Sira Husu Prezidenti Komisaun Ezekutivu EDTL,E.P Rezigna Aan

Hatutan.com, (10  Fevereiru 2025), Díli– Ikus-ikus ne’e, eletrisidade iha territóriu nasionál komesa lakan la normal. Kauze tempu udan ka rai-nakukun uitoan, eletrisidade mate-lakan fali ona hodi prejudika ema kliente sira-nia sasán eletrónika iha uma-laran.

Lee Mós: EDTL,E.P Konstrui Tán Sub-Estasaun Comoro no Rede Transmisaun 150 Kv

Edífisiu EDTL,E.P iha Caicoli, Díli. Foto/Elio dos Santos da Costa

Fenómena eletrisidade mate-lakan ne’e halo deputadu sira   “hirus” no husu atu Prezidente Komisaun Ezekutivu Eletrisidade Timor-Leste, Empreza Públika (EDTL,e.P), Paulo da Silva rezigna aan ona.

Liuhosi intervensaun iha plenária Parlamentu Nasionál (PN),  Segunda (10/02/2025), membru PN hosi Bankada  CNRT, Cedelizia Faria dos Santos, preokupa ho eletrisidade ne’ebé mate-lakan beibeik iha territóriu nasionál.

“Ha’u la menta loos ho ita-nia eletrisidade ne’ebé mate-lakan,” Deputada Cedelizia Faria dos Santos afirma. Nia hateten esperiénsia foin dadaun Komisaun C-PN  bá halo fisklalizasaun iha Ministériu Finansa, ahi eletrisidade ne’e mate hela de’it kuazé tanba iha MF hatene katák sasan elektróniku barak loos uza sistema online sira ne’e konsentra hotu iha eletrisidade, nune’e ahi mate-lakan ne’e prezudika tebes bá servisu minstériu hotu-hotu

Reprezentante povu ne’e hateten tán iha parte Comoro, Díli, kliente sira EDTL,E.P hatene kle’an eletrisidade iha ne’ebá lakan mate estraga hotu ema nian sasan eletróniku, inklui paraliza atividade negósiu ki’ikoan sira ne’e hodi hetan retornu.

“Ne’ebé husu bá Governu favór bele tau atensaun bá asuntu ida-ne’e, lideransa  ida iha EDTL,E.P ami husu sé nia  la iha kapasidade karik di’ak liu nia rezigna aan de’it,  duké fó terus fali bá povu ki’ik sira,” Deputada Cedelizia Faria dos Santos afirma.

Iha sorin seluk membru PN hosi Bankada FRETILIN, Oscár Lima mós hato’o preokupasaun Povu Munisipíu Ermera nian kona-bá eletrisidade.

“Ha’u rasik mós bá iha Etmera sente katák Ermera ne’e ahi mate ne’e liu ona normal, mate ne’e dalaruma to’o  fali  loron tolu ka haat mak lakan fali, ne’ebé ha’u hanoin ida-ne’e problema ida sériu ne’ebé favór haree took bá,” Depurtadu Oscár Lima hateten iha nia intervensaun.

Nia hateten tanba Prezidenti Komisaun Ezekutivu EDTL,E.P ne’e ema matenek mak tau iha ne’ebá, sé tau ema iha rai-laran mak laiha kapasidade halo jestaun iha ne’ebá bele buka alternative seluk.

“Ita bele halo kontrata bá ema iha ra- li’ur mai rezolve tiha problema ida-ne’e, tanba EDTL ne’e ita gasta ona osan barak-barak bá iha ne’ebá,” Oscár Lima Preokupa.

Hatán bá kestaun ne’e, Vise-Ministru Asuntu Parlamentár, Adérito da Costa Hugo, ne’ebé reprezenta Governu akompaña intervensaun membru PN sira-nian iha PN, haktuir nia parte sei envia preokupasaun deputadu sira nian bá iha Minstériu relevante atu bele fó resposta no solusaun.

Iha loron 13 fulan-Janeiru 2025, Ministru Obras Públika (MOP), Samuel Marçal, liuhosi Despaxu Nomeasaun membru Konsellu Administrasaun ba Komisaun Ezekutivu EDTL,E.P entende tan mandatu Prezidente  Komisaun Ezekutivu EDTL,E.P, Paulo da Silva ba tinan-haat (4) tan hosi 2025-2029 ho remunerasaun/saláriu  $4500.00/fulan.  

Jornalista Estajiária: Zita Menezes