MAE Distribui Laptop ba Postu Administrativu 66 Atu Fasilita Servisu Dijitalizasaun

Hatutan.com, (10 Fevereiru 2025), Díli—Ministériu  Admistrasaun Estatál (MAE) liu husi Sekretariu Estadu Dezenvolvimentu Lokál (SEDL), Mateus Wilfredos dos Santos Tallo, akompaña husi Sekretariu Estadu asuntu Toponimia no Organizasaun Urbana (SEATOU), Germano Santa Dias Brites, Segunda (10/02/2025), distribui laptop (notebook) ho marka HP ba postu admistrativu 66 iha Timor-Leste.

Lee Mós: MAE Distribui Komputadór 445 Bá Suku Sira

MAE distribui notebook ka laptop ba IT sira iha postu administrativu 66. Foto/Leopoldina de Carvalho

Iha ámbitu serimónia ne’ebé hala’o iha edifísiu MAE, Díli, Sekretariu Estadu Dezenvolvimentu Lokál (SEDL), Mateus Wilfredos dos Santos Tallo hateten iha tinan kotuk, Govenru rekruta ona pesoál IT hodi koloka iha postu administrativu hodi apoiu servisu Governu sentrál nian,  ba programa desentralizasaun poder lokal no  digitalizasaun servisu admistrasaun publiku nian iha baze.

“Hanesan indikador importante ida ne’ebe  ita ptesiza tau-matan no aselera atu atende ita-nia komunidade sira iha kraik, servisu sira ne’ebe liga ho admistrasaun publika ita presiza dijitaliza,” Sekretariu Estadu Mateus Wilfredos dos Santos Tallo hateten iha nia diskursu.

Liga ho rezultadu peskiza ne’ebe halo iha tinan kotuk iha informasaun lubuk ida ne’ebe presiza partilla ba komunidade sira, nune’e  IT sira bele hatama informasaun sira ne’e iha portal munisipál. Tanba iha dadus lubuk ne’ebe presiza tau atensaun para públiku bele asesu, liu-liu iha sistema integradu informsaun jestaun suku no aldeia (SIIGSA).

Iha biban ne’e SEATOU Germano Santa Dias Brites husu ba pesoál IT sira iha kada postu admistrativu atu utiliza ekipamentu elektroniku sira ne’ebe mak  distribui ona hodi uza tuir nia dalan.

“Labele  ba joga fali karta iha laran, liu-liu iha toponimia nia servisu ne’e mak atu tau ita-bo’ot sira IT didiak ba para atu tau GPS iha laran, tau mos numerasaun sira iha laran, stasionamentu sira iha laran, naran Estrada sira atu nune’e bele fasilita postu sira, ita nia turista sira lao saida karik sira hetan difisukdade,” Germano Santa Brites Dias esplika.

Tuir informasaun ekipamentu elektroniku ne’ebe distribui ba tekniku postu admistrativu 66 sosa ho orsamentu jerál estadu (OJE) tinan fiskál 2024 hosi kategoria kapital menor.

Jornalista: Leopoldina de Carvalho