PCIC Rejista Krime Burla Agravadu Kada Tinan Liu 40

Hatutan.com, (11 Fevereiru 2025), Díli- Diretór Nasionál Polísia Sientífika Investigasaun Kriminál (PCIC-portugés), Vicente Fernandes e Brito, informa kada tinan PCIC rejista númeru krime burla agravadu liu 40 ho montante osan liu $2000.00.

Lee Mós: Membru PCIC Ida Uza Arma Ameasa Joven sira iha Área Delta-IV

Edifísiu PCIC iha Caicoli, Díli. Foto/Lazaro Quefi Pereira

Diretór Nasionál PCIC, Vicente Fernandes e Brito ba jornalista sira iha nia kna’ar fatin Colmera, Díli, Segunda (10/02/2025),  hateten PCIC prepara hela relatóriu anual 2024 no sei iha prosesu nia laran maibé atu informa katak krime ne’ebé PCIC rejista as liu mak burla (penipuan).

“Kada tinan krime burla ne’e nia númeru bele atinje liu 40 prosesu ho valór boot no kuandu kaer ne’e sempre boot, bolu dehan burla agravadu, liu $2000.00,” Vicente Fernandes e Brito hateten.

Diretór Nasionál PCIC ne’e hatutan krime seluk ne’ebé mós ho númeru aas mak falsifikasaun dokumentu, no agora PCIC simu hela lista no halo hela prosesu investigasaun mas dadus hatudu katak burla ne’e mak númeru boot liu no estatistikamente nia númeru ida iha ne’e.

DIKN Rejista WNI  ida Halo peñór Ilegal ba Karreta husi NTT

Hosi sorin seluk, Xefe Departamentu Investigasaun Kriminal Nasional (DIKN) Superintendente Polísia João Belo dos Reis, hateten sidadaun Indonézia ida aluga ema seluk nia karreta iha Nusa Tenggara Timur (NTT) hodi tama territóriu nasionál Timor-Leste ho dalan legal, maibé to’o Timor karreta ne’e tenta atu fó peñór fali ba ema seluk tamba ne’e mak Polísia identifika no na’in deklara ba Polísia katak karreta ne’e ninian tamba ne’e mak sidadaun ne’ebé mak halo peñór ilegál ba ema seluk ne’e ita prosesu agora.

“Karreta n’ain ho sidadaun ida ne’ebé halo peñór ilegal ne’e ema Indonézia hotu, no sidadaun ida ne’ebé simu peñór ne’e mak sidadaun Timoroan no sidadaun Indonézia ne’e ba peñór karreta ne’e ho valór osan $2000.00 ba lete,” Superintendente Polísia João Belo dos Reis hateten.

Evidénsia sira iha hotu ona kuartél Jerál PNTL no karreta ho marka Avans2000.00 iha ona DIKN nia liman no sei halo prosesu normal. Karreta ne’e tama mai territóriu nasionál Timor-Leste iha semana kotuk.

Jornalista: Vito Salvadór