Ekonomia
Aero Dili Lansa Vou Direta Díli-Xina
Hatutan.com (14 Fevereiru 2025), Díli– Aviaun komersiál empreza Timoroan nian, Aero Dili ho bandeira RDTL, Sesta (14/02/2025), tuku 17:00 Oras Timor-Leste, hala’o lansamentu vou direta hosi Díli ba Xiamen-Xina no husi Xiamen-Xina mai Díli.
CEO Aero Dili, Lourenço de Oliveira entrega prenda ba Embaixadora Xina mai Timor-Leste, Wang Wenli iha ámbitu lansamentu vou aviaun Aero Dili ba Xiamen-Xina iha Aeroportu Internasionál Prezidente Nicolau dos Reis Lobato, Sesta (14/02/2025). Foto/Elio dos Santos da Costa
Lansamentu vou dahuluk ne’e diretamente halo hosi Prezidenti Repúblika, José Ramos-Horta, akompaña hosi Minstériu Transporte no Telekomunikasaun (MTK), Miguel Marques Gonçalves Manetelu, Minstériu Negosiu no Estranjeiru (MNEK), Bendito Freitas, Komandante Jenerál F-FDTL Tenenti Jenderal Falur Rate Laek, Embaixadora Xina mai Timor-Leste, Wang Wenli ho mós CEO Aero Dili, Lourenço de Oliveira.
Prezidenti Repúblika José Ramos-Horta hato’o agredesimentu bá Governu Timor-Leste no Governu Xina ne’ebé asina akordu iha fullan-Jullu 2024 hodi fasilita vou direta Aero Dili ba Xina.
“Ho koneksaun ida-ne’e Dili-Xiamen ne’e bele dada turista husi Xina mai Timor-Leste, ne’e sei loke tán oportunidade ekonomika, halo mós promosaun bá kultura iha eransa no hametin liután koopersaun billaterál,” José Ramos-Horta, hatetne iha nia diskursu iha ámbitu lansamentu vou dahuluk Aero Dili nian hosi Dili ba Xiamen iha Aeroportu Internasionál Prezidente Nicolau dos Reis Lobato.
Xefe estadu afirma ho konektividade ida-ne’e, sé iha nesesita hadi’a infraestrutura iha Aeroportu ne’ebé kada tinan hadi’a, maibé presiza nesesita foti bá nivél estandar internasionál.
“Ha’u nian parabens makaas bá Aero Dili no funsionáriu tomak, liuliu bá Sr. Lourenço de Oliveira. Nia ema ida mehi, ema ida ho vizaun, no ema ida la tauk bele iha riskú, maibé nia halo, nia Timoroan ida ne’ebé ho orgullu no patriota duni, nia hatudu ninian dedikasaun no kompromisu bá inisiativa ida-ne’e,” Prezidenti Repúblika apresia.
Ministru Transporte no Telekomunikasaum (MTK) Miguel Marques Gonçalves Manetelu iha nian diskursu hateten iha lansamentu vou dahuluk Aero Dili, husi Dili bá provinsi Xiamen-Xina, iha inisiativa ida-ne’e importante tebes iha Timor-Leste nian istória, tanba haluan tán konektividade internasionál entre Dili no Xina. Aliende, Indonézia Singapura no tempu badak Austrália no ho Malázia tan.
Konvidadu sira partiispa iha serimonia lansamentu vou Aero Dili hosi Dili ba Xiamen-Xina. Foto/Elio dos Santos da Costa
“IX Governu konstituisionál fó importánsia bá setór transporte nu’udár pillar importante ida iha dezemvolvimentu ekonomiku nasaun nian, Governu nian papél mak atu kria kondisaun bá krésimentu ekonómiku, hadi’a no aumenta sirkulasaun ema no sasan tuir planu estratejikú ne’ebé mak iha,” Ministru Miguel Manetelu hateten.
Transporte Aero sai nu’udár servisu save bá movimentu ema no sasan mai Timor-Leste no bá mundu, tanba ne’em, Miguel Manetelu hateten, Aero Dili mós sei tulun atu dudu dezemvolvimetu industria turistiká komersiu no nivél sira seluk.
Iha fatin hanesan CEO Aero Dili, Lourenço de Oliveria agradese bá Governu Xina ne’ebé mak simu ona Aero Dili atu bá halo vou dahuluk bá Xina, agradese mós bá Governu Timor-Leste no Prezdienti Repúblika ne’ebé mak laran luak, apoiu no bele to’o mai hodi fó netik liafuan murak ruma mai Aero Dili para bele semo bá Xina
“Espera Aero Dili bele fó servisu di’ak bá passajeiru sira hotu no mós agradese bá suporta durante tempu tomak husi parte Governu Timor-Leste no Governu Xina,” Lourenço de Oliveira, emprezáriu nasionál ne’e teni.
Billeti aviaun vou husi Dili bá Provinsi Xiamen-Xina ne’e kada vou $480.00 no sei para oras ida iha Aeroporu Xiamen no mai fali kedan Timor, no aviaun Aero Dili foun ida ho marka AirBus A319 sei mai tán iha inisiu fulan-Marsu 2025.
Iha fulan-Fevereiru to’o Marsu kada fulan, Aero Dili sei halo viajen Dili-Xiamen dala rua de’it no iha fulan-Abríl mak sei viajen dala ida kada semana hodi haree took merkadu no pasajeiru bá oin.
Daudaun ne’e. Aero Dili halo ona operasaun Díli-Denpasar, Indonézia no Díli-Singapura hodi kontribui konetividade Timor-Leste nian ba iha rejionál no global.
Jornalista Estajiária : Zita Menezes