Governu Sei Halo Avaliasaun ba Kontratu Konsesaun ho ENSSUL

Hatutan.com, (19 Fevereiru 2025), Díli—Governu liuhosi Ministériu Justisa sei halo hikas avaliasaun ba ereditáriu sira propriedade estadu nian, iha espasu antrigu sosiedade, Colmera, Díli ne’ebé governu sira liubá estabelese akordu konsesaun ho kompañia  ENSSUL Maci-Gestão de Projectos de Enginharia, S.A.   

Lee Mós: TR Deside Rai Ne’ebé ENSUL MECI Arrenda Husi Governu Pertense Rai Privadu

Investimentu no Konstusaun DFBC iha rai ho uma Estadu ne’ebé hamosu disputa entre SAPT ho ENSUL MECI. Foto/Dok.Hatutan.com

Kontratu konsesaun ne’ebé Governu estabelese ho kompañia  ENSSUL Maci-Gestão de Projectos de Engenharia, S.A husi Portugál ne’e hala’o iha loron 16 fulan-Abríl 20210 ho durasaun tinan-50 ba interese investimentu Dili Financial Business Centre (FBC) maibé to’o agora edifísiu medida andar besik 10 ne’e paradu.

Ministru Justisa (MJ), Sergio Hornai ne’ebé Hatutan.com konfirma iha Palásiu Governu, Kuarta (19/02/2025), esplika katak kontratu konsesaun sira ne’e halo tiha ona iha governu anteriór sei nafatin hanesan legasia ba governu foun hodi tau-matan no kompañia   ENSSUL Maci-Gestão de Projectos de Enginharia, S.A halo hela atividade negósiu no investimentu balun iha área antigu Sosiedade mezmu seidauk konklui.

“Ami sei koalia nafatin ho arendatariu sira para atu haree halo avalisaun ba sira-nia empañamentu para atu kumpre ba iha kontratu ne’ebe mak governu halo tiha ona ho arendatariu sira,” Ministru Justisa Sergio Hornai hateten.

Nia dehan governu mós  presiza haree buat ruma ne’ebé mak kestaun tekniku liu, kona-bá bainhira  atividades investimentu ruma, iha obrigasaun atu dezenvolve rai ne’e, hodi halo kontrusaun.

“Sira laiha direitu ba rai, maibe sira bele konstrui rai refere ba andares nune’e hodi halo fali atividade negosiu , atu bele halo aluga fali ba iha ema seluk hanesan mós halo iha  direitus supervision ne’ebe halo ba iha hanesan timor plaza no mos sira seluk,” Sergio Hornai esplika.

Kona-bá pesoál balun utiliza propriedade  Estadu nian hodi hetan kontratu konsesaun, maibé la hala’o investimentu fo aluga fali ba empreza internasionál halo atividade no sira kobre kada fulan ho kustu boot liu fali kustu arrendamentu ne’ebé halo ho Estadu,  Ministru Sergio Hornai hateten, dau-daun ne’e governu hahú regularize ona atu halo re-identifikasaun ba iha objetu sira ne’ebé pretense ba iha dominiu privadu no domíniu estadu nian.

Jornalista : Leopoldina de Carvalho