Estrada Sira iha Ainaro Aat Ba Beibeik

Hatutan.com, (11 Marsu 2025), Díli– Membru Parlamentu Nasionál hosi  Bankada PD, Mariano Fernando Malik, Tersa (11/03/2025), hato’o preokupasaun povu Munisípiu Ainaro nian iha plenária hodi fó hanoin ba Governu atu tau atensaun ba kondisaun estrada sira  iha Ainaro ne’ebé  kuaze aat ba beibeik.

Lee Mós: Fiskalizasaun Komisaun E-PN Identifika Estrada Barak Sei Aat

Udan-boot durante loron tolu, hahú hosi loron 03-05 fulan-Jullu 2023, rezulta rai halai no rai monu hodi taka tomak estrada kuaze metru 50 iha Aldeia Airaca-Lau, Suku Ai-Tutu, Postu Administrativu Maubisse, munisípiu Ainaro, no komunidade susar atu asesu mai Díli, Sesta (07/07/2023). Foto/Dok. Hatutan.com

“Ha’u hato’o preokupasaun kona-bá estrada Munisípiu Ainaro tanba tuir ha’u nia haree durante tempu ukun aan, tinan 24 resin ona, maibé estrada sira iha Ainaro aat bá beibeik tanba  estrada sira-ne’e sai fali hanesan mota,” Deputadu Mariano Malik hateten iha nia intervenzaun.

Nia hatutan estrada iha Ainaro Vila ne’ebé sai estrada protokolu ne’e nakfilak bá mota, no mós estrada ne’ebé liga bá Postu-Administrativu no Munisipíu sira ladi’ak no aat tebetebes.

Membru PN ne’e nia observasaun katák bainhira iha tempu udan atividade sira husi Postu-Administrativu sira bá Munisípiu Ainaro paradu totál, tanba kondisaun estrada no ponte laiha.

Iha fatin hanesan Vise-Ministru Asuntu Parlamentár Adérito da Costa Hugo hateten Governu sei hato’o preokupasaun ida-ne’e bá minstériu relevante hanesan Minstériu Obras Públiku (MOP) hodi bele tau atensaun.

Jornalista Estajiária: Zita Menezes