Aero Dili Rejeita Intervensaun Deputadu Natalino Dehan Governu Fó Subsídiu Bá Vou Internasionál

Hatutan.com, (18 Marsu 2025), Díli- CEO Aero Dili, Lourenço de Oliveira, rejeita intervensaun Deputadu Natalino dos Santos nian iha plenária, Segunda (17/03/2025), dehan Governu tau tiha subsídiu ba Aero Dili, maibé billete aviaun folin kontínua karun.

Lee Mós: Governu TL-Xina Apresia Esforsu Aero Dili Halo Konetividade Direita bá Nasaun-Rua

CEO Aero Dili, Lourenço de Oliveira. Foto/Elio dos Santos da Costa

Iha plenária PN Deputadu Natalino dos Santos, husu Governu atu haree tanbasá  tau tiha subsídiu ba aviaun aero maibé  folin ne’e sa’e makaas.

“Ida-ne’e preokupasaun tebes ba populasaun sira nia,” Natalino dos Santos haktuir.

Iha biban ne’e, Vise-Ministru asuntu Parlamentár Adérito Hugo hateten Ministériu Transporte no Komunikasaun sei  haree ba asuntu ida-ne’e kona-ba presubillete ne’ebé presu sa’e, liu-liu vou Dili ba Bali ne’ebé konsidera  aas tebes.

“Ita hatene katak iha periodu sira antes ne’e presu billete aviaun folin baratu, husi $78.00 too $80.00 d’eit, agora ba mai Dili Por volta $200.00,” Adérito Hugo kestiona.

Governante ne’e haktuir bainhira loke nafatin merkadu konetividade Aero nia ba Airlines barak liu tan bele atinje presu ne’e tun automatikamente hanesan iha períodu balun iha 2010.

Nia hatutan merkadu  livre ona  signifika ba kualkér operadora aviaun bele tama no  ministériu relevante halo jestaun ba ida ne’e no laiha monopóliu

Ba kestaun sira ne’e, CEO Aero Díli Lourenço de Oliveira liu husi konferénsia imprensa iha edifísiu Aero Díli, Timor Plaza, Tersa (18/03/2025), afirma nia akompaña deklarasaun sira ne’ebé deputadu sira hasai iha Parlamentu Nasionál no vise-Ministru Asuntu Parlamentár hasai kona-ba subsídiu ba Aero Díli no iha deklarasaun sira ne’e hateten katak governu asina ona subsídiu maibé billete aviaun folin kontínu sae.

“Iha realidade ha’u la simu subsídiu kona-bá aviaun atu semo ba Indonézia no ida-ne’e laiha. Ha’u simu duni $50,000 ba vou doméstiku ba Oé-Cusse dala tolu ona, maibé ida ne’e seidauk too no Aero Díli tenke tau tan $7,500.00 ba kustu operasaun no id- ne’e mak hala’o hela too agora tamba billete aviaun ba Oé-Cusse mós baratu $20,00-$25,00 kada vou no povu ki’ik mos bele asesu,” Lourenço de Oliveira hateten.

Na’in ba Aero Dili ne’e hatutan liután katak subsídiu $50,000.00 ne’ebé governu oferese ba Aero Díli ne’e hanesan gratifikasaun ida no dezde fulan-Juñu 2023 too agora foin simu dala tolu atu apoiu vou doméstiku ne’ebé iha no atu simu fali subsídiu ba vou internasionál, liu-liu ba Indonézia ne’e Aero Díli nein simu no laiha asinatura kontratu ruma.

Nia klarifika mós katak to’o agora Aero Díli la simu subsídiu ruma ba vou internasionál tamba ne’e deputadu sira presiza ko’alia ho faktu tanba to’o agora Aero Díli seidauk simu subsídiu ruma husi Governu liu-liu ba vou internasionál nian.

“Ha’u atu dehan katak ha’u simu dunik subsídiu mais ba vou doméstiku loos de’it, atu simu fali subsídiu ba vou sira seluk, liu-liu ba Indonézia ne’e laiha no ha’u seidauk asina akordu subsídiu ruma ho Governu kona-ba vou internasionál sira, liu-liu ba Indonézia,” Lourenço de Oliveira hateten.

CEO Aero Díli subliña liután katak deputadu sira presiza halo verifikasaun ba faktu sira no bele mós verifika iha parte Governu nian hodi hatene kona-bá subsídiu sira ne’ebé iha no apoiu gratifikasaun ne’ebé governu fó ba empreza Aero Díli.

Kona-ba presu billete aviaun tinan sanulu ba kotuk ne’ebé ho presu baratu hahú husi $75.00 too $85.00 ne’e loos, maibé labele haluhan mós katak kada tinan inflasaun ekonomia global sa’e 3% no agora iha 2025 no uluk folin mina $0,70 too $ 0,80/litru mas agora sa’e ba $1.20 signifika inflasaun ne’e aumenta no imposivel billete aviaun ho nafatin folin anterior, tamba ne’e  bele hamosu prejuizu ba empreza no laiha retornu ba sustentabilidade empreza nian.

Lourenço de Oliveira subliña mós katak iha diferente entre hatama ema nia aviaun no iha rasik empreza Aero hodi halo atividade ekonómiku iha rai laran, tamba ne’e presiza halo verifikasaun no tetu ho risku hotu-hotu molok halo komentáriu peranti públiku tamba iha akordu servisu aero hateten momoos katak bainhira empreza aero husi nasaun seluk semo mai  Timor-Leste labele halai sees husi akordu ne’ebé iha, lae laiha ona imparsialidade.

Nia dehan Aero Díli baibain fa’an billete Díli ba Bali ho folin $300.00 ba Business class no economic class hahú husi $ 207.00 no másimu liu $ 270.00 no se ajénsia  tikete sira fa’an ho presu diferente ho ida ne’ebé  Aero Díli f’aan direita ne’e razoavel tamba mós business.

Aero Díli sei inaugura ofisiál  aviaun foun Airbus A319

CEO Aero Díli, Lourenço de Oliveira hateten iha loro 21 fulan-Marsu tinan ne’e Aero Díli sei ofisializa inaugurasaun ba aviaun da-ruak Airbus A319.

“Aviaun sei too mai iha loron 21 fulan ne’e, ho konfigurasaun Business Class kamera 8 no ba economic class hamutuk kadera 120,” Lourenço de Oliveira.

Nia subliña ho prezensa aviaun Aero Díli da-ruak sei fó biban másimu liután atu bele halo vou internasionál sira ba Xina, Singapura, Maláyzia, Tailándia inklui ba Austrália.

“Tinan ne’e ita loke tan vou internasionál ba Tailándia no ba Austrália. Buat hotu husi parte aviasaun sivíl Austrália nian loos hotu ona no falta de’it husi Ministériu Negósiu Estranjeiru nian no ida-ne’e polítiku liu no ita hein hela ida-ne’e,” Lourenço de Olivera informa. hakotu.

Jornalista: Elio dos Santos