MJDAK Hahú Halo Diskusaun Tékniku Atu Dezenvolve Estádiu Munisipál Díli

Hatutan.com, (19 Marsu 2025), Díli-Ministru Joventude Desportu  Arte no Kultura (MJDAK)  Nelio Isaac Sarmento hateten sira-nia parte hahú halo enkontru ho kontraktor husi Xina  ne’ebé iha espesialidade hakarak koopera ho Governu Timor-Leste oinsá mak atu ajuda dezenvolve Estádiu Munisipál Díli no infraestrutura Desportu iha Timor-Leste.

Lee Mós: Governu Aprova Millaun $3.6 bá Eventu Multi-Desportiva CPLP Dala-XII iha Timor-Leste

Ministru Juventude Desportu, Arte no Kultura (MJDAK), Nélio Isaac Sarmento.

“Kontraktor Xinés sira mai ho ideia ida nusa mak bele servisu hamutuk para bele dezenvolve karik Governu hakarak harii estádiu ida di’ak iha Timor-Leste. Haree terrenu no fatin ne’ebé mak ita bele oferese para depois sira bele apoiu no dezenvolve kona-bá konseitu bá harii estádiu Munisipál,” Ministru MJDAK Nelio Isaac Sarmento bá jornalista sira iha Palásiu Governu, Kuarta (19/03/2025).

Nia afirma iha Munisípiu Díli neste momentu  laiha  rai ida atu harii estádiu ida ho padraun FIFA no iha de’it estádiu munisipál Díli entaun sira bá haree para oinsá halo  tuir konseitu no dezeñu tuir Timor nian nesesidade.

“Ita mós halo diskusaun ho teknikú sira depois hotu tiha sira sei mai ho hanoin ida hodi tetu kustu sira, nia impaktu no durasaun halo nusa, horisehik foin halo diskusaun téknika de’it ho konsultan sira husi nasaun seluk,” Nia esplika

MJDAK daudaun ne’e sei prepara no tau hela prioridade bá atividade jogu CPLP ne’ebé mak sei realiza iha Timor-Leste iha tempu badak ne’e.

Jornalista Estajiária: Zita Menezes