Komisaun F Identifiká Ambulánsia Sentru Saúde Kailaku Avária Durante Fulan-Lima

Hatutan.com, (24 Marsu 2025), Díli– Parlamentu Nasionál liuhosi fiskalizasaun Komisaun F ne’ebé trata asuntu Saúde, Seguransa Sosiál no Igualdade Jeñeru,  identifiká ambulánsia iha Sentru Saúde  Kailaku avária durante  fulan-lima ona.

Lee Mós: SNAEM, I.P Entrega Ambulánsia Foun Lima Ba Sentru Saúde Sira

PM Xanana akompaña simulasaun ekipa Ambulánsia ne’ebé preparadu atende emerjésia iha ámbitu vizita Papa Francisco. Foto/GPM

“Ami komisaun F bá halo fiskalizasaun iha Munisipíu Bobonaro iha loron 19-20 fulan-Marsu foin lalais iha Postu-Administrativu Kailaku, ami konsegé detekta transporte tula moras aat tiha ona durante fulan-lima,” membru PN Helder Freitas “Kamarudin”  informa iha nia  intervenzaun iha plenária PN, Segunda (24/03/2025).

Membru Komisaun F-PN ne’e afirma katák  povu sira iha ne’ebá moras ida-idak buka tansporte alugá hodi tula moras mai Sentru Saúde Kailaku, rekursu umanu mós menus, no motór rua de’it frizér tau ran laiha Parteira ida de’it, ai-moruk la kompletu.

Xefe Bankada PLP Maria Angelina Sarmento hatutan tán katák  Ministra Saúde foin lalais entraga  Ambulánsia bá Prezidenti Repúblika ne’e la logiká tanba Prezidente Repúblika  iha Dilí bele fasil atu asesu bá Sentru Saúde no Ospitál no iha regalia sira seluk tán.

“Povu sira ne’ebé iha areá remota laiha asesu bá ambulánsia, sira balu foin dadaun ema tau iha média sosiál tau katák Ambulánsia avaria iha fatin ida nune’e idozu atu halo transporta bá sentru saúde ambulánsia laiha tanba avária no familia tenke aluga angguna ida hodi tula bá sentru saúde entaun ami preokupa tebes tanba ita entrega ambulánsia bá ida-ne’ebé mak la’ós prioridade,” Deputada Maria Angelina Sarmento hateten.

Nia husu Ministériu Saúde presiza iha dadus sentru saúde sira ne’ebé kritikú liu hanesan laiha fasilidade tansporte Ambulánsia multifunsaun sira atu bele transporte pasiénste sira ne’ebé mak presiza.

Vise-Ministru Asuntu Parlamentár, Adérito Hugo da Costa hateten, asuntu ne’e nia sei envia bá Minstériu Saúde atu bele tau atensaun.

Jornalista Estájiaria : Zita Menezes