Ramos-Horta Presta Omenajen Ba Vítima Setembru Negro 1999 iha Suai no Fahe Nesesidade Báziku Ba Kbiit-Laek ho EhD sira

Hatutan.com, (26 Marsu 2025), Covalima– Prezidente Repúblika (PR), José Ramos-Horta, Kuarta (26/03/2025), hala’o vizita no tau ai-funan iha monomentu Masakre  Setembru Negro 1999 iha Suai-Covalima.

Lee Mós: Xefe Estadu Apoiu Nesesidade Báziku bá Família Defisiénsia no Vulneravel iha Fadabloco ho Açu-Mau

Prezidente Repúblika, José Ramos-Horta presta omenajen ba vítima masakre Setembru Negro 1999 iha Suai, Kuarta (26/03/2025). Foto/Tome da Silva

Monomentu Masakre Setembtu Negro 1999 Suai lokaliza iha Suku Debos, Postu Administrativu Suai Vila, Munisípiu Covalima.

Xefe Estadu hateten hahú programa iha Suai ho tau ai-funan ba martir sira iha Suai Setembru Negro 1999.

“Iha Suai situasaun violénsia nian makas los iha momentu ne’eba hafoin no molok konsulta popular 1999. Ita reispeitu tau ai-funan, halo orasaun ba vitima sira iha tempu 1999,” Prezidente Repúblika (PR), José Ramos-Horta hateten.

Iha atividade tau ai-funan ne’e, hetan partisipasaun husi membru Governu balun, Tenente Jenerál reformadu Lere Anan Timur inklui autoridade Munisípiu Covalima.

Fahe Nesesidade Bázika ba EhD sira

Prezidente Repúblika (PR), José Ramos-Horta aproveita vizita servisu ne’e  fahe mós nesesidade bazika ba komunidade kbiit laiha sira ho mós ema ho defisiénsia (EhD) sira iha Munisípiu Covalima.

Benefisiáriu sira ne’e mai husi postu administrativu hitu (7) mak hanesan, Fatululik, Fatumea, Fohorem, Maucatar, Suai, Tilomar no Zumalai ho totál ema-850), maibé postu Tilomar no Zumalai sei fahe iha loron 27 fulan-Marsu 2025.

PR Ramos-Horta fahe nesesidade baziku ba kbiit-laek ho EhD sira iha Munisípiu Covalima. Foto/Tome da Silva

“Ohin, hahú ho programa espesiál, programa ajuda umanitaria, atividade prinsipál liu mak ne’e, haree de’it situasaun, fó tulun ruma ba kbiit laek sira, liu-liu ba ema ho difisiensia,” José Ramos-Horta hateten.

Armindo Araújo Amaral, hanesan benefisiáriu husi grupu ema ho difisiensia orgulhu tanba bele hetan tulun hosi Prezidente Repúblika (PR), José Ramos-Horta.

“Prezidente fahe ai-han ne’ebé fó ami, ami kontenti tanba ami difisiensia halo buat ruma ladiak, mak nai prezidente hanoin fó ami. Maluk sira ne’ebé difisiensia hanesan ami mak seidauk simu karik, nai prezidente mós bele fó ba sira,”   Armindo Araújo Amaral hateten.

Nesesidade bazika ne’ebé fahe mak hanesan, mina, foos, manu-tolun inklui mós roupa balu.

Jornalista : Tome da Silva