Cova Lima
PR Ramos-Horta Apoiu $1000 ho Mákina Suku-Roupa Rua Ba Uma-Mahon Sentru Esperansa Salele
Hatutan.com, (27 Marsu 2025), Covalima- Prezidente Repúblika (PR), José Ramos-Horta, apoiu orsamentu $1000, makina suku-roupa rua (2) no roupa balun, inklui nessesidade bazika ba Uma-Mahon Sentru Esperansa bá feto iha Suku Salele, Postu Sdministrativu Tilomar, Munisípiu Covalima.
Prezidente Repúblika (PR), José Ramos-Horta, apoiu orsamentu $1000, makina suku-roupa rua (2) no roupa balun, inklui nessesidade bazika ba Uma-Mahon Sentru Esperansa bá feto iha Suku Salele, Postu Sdministrativu Tilomar, Munisípiu Covalima, Kinta (27/03/2025). Foto/Tome da Silva
Xefe Estadu hateten tulun ne’ebé mai husi Prezidensia Repúblika, tulun ne’e mai husi Estadu no nia halo de’it nia nia obrigasaun, halo de’it nia nia konsiénsia buka ajuda ba labarik sira ne’ebé hetan violénsia, ka labarik sira ne’ebé moris iha difikuldade susar tebe-tebes.
“Apoiu ne’ebé entrega, mai husi estadu, Governu, parlamentu. Governu maun Xanana nia apoiu 100% atividade ne’ebé Prezidente Repúblika hamutuk ita buka hamenus tiha inan-aman, avo sira nia susar. Maibé komunidade balun internasionál hanesan Japaun, Korea du Súl, iha mós ema barak iha Austrália koñese ha’u husu ba sira, sira sei kontinua nafatin apoiu programa sira,” Ramos-Horta hateten iha Salele, Kinta (27/03/2025),
Direitora Sentru Esperansa ba Feto, Santina Imaculada agrades ba Prezidente Repúblika (PR), José Ramos-Horta ne’ebé ohin loron ohin apoiu direita ba Uma Mahon Salele.
“Ha’u hakarak hatete de’it katak alin sira hotu ne’ebé hamahan aan iha fatin ida-ne’e, ami durante ne’e la la’o mesak, ami nafatin hetan apoiu no suporta másimu husi Governu Timor-Leste, espesialmente Prezidente Repúblika nia prezensa apoiu no tulun nafatin ami. Maske atividade barak ne’ebé la marka direita ho ami, maibé apoiu no suporta ne’ebé nafatin mai ami, husi tempu no tempu. Ami hotu agradese tanba ami nafatin hetan apoiu no suporta,” Santina Imaculada hateten.
Direitóra ne’e informa labarik sira ne’ebé hela iha fatin ida ne’e, durante ne’e haree de’it Prezidente Repúblika, liu husi televizaun, dala barak labarik sira dehan bainhira mak bele hasoru Prezidente Repúblika direita, entaun ida-ne’e hanesan mehi boot ne’ebé sai realidade ba labarik sira.
Santina Imaculada orgullu tanba Governu Timor-Leste ne’ebé apoiu no suporta kongregasaun Servem do Esperitu Santu (SSPS), liuhosi Fundadaun Sentru Esperansa Feto, durante tinan 2006 to’o mai momentu ida ne’e.
Labarik sira iha Uma-Mahon Salele mai husi munisípiu 10, sira mai ho sira nia tipu kazu ne’ebé oi-oin no sira nia problema sosiál ne’ebé oi-oin. Mai ho violénsia domestika, abuzu seksual ba minoridade, violénsia seksual ba insestu, no mós ba abandonadu sira ne’ebé iha.
“Ami la servisu mesak, no alin sira ne’e lá’os direta mai mesak maibé mai husi parseiru servisu sira, liu husi Ministériu Solidaridade Sosiál no Inkluzaun (MSSI) nia tékniku sira ne’ebé iha munisípiu, hamutuk ho ALFELA, FOKUPERS, PRADET, no mós sosiédade sivil sira ne’ebé nia vizaun no misaun hanesan kongregasaun SSPS hakarak atu proteze no asegura feto no labarik ne’ebé hasoru violénsia iha sira nia moris,” Direitora Sentru Esperansa ba Feto ne’e tenik.
Uma-Mahon ida-ne’e kongregasaun hari’i nu’udár SSPS, maibé nia objetivu no nia misaun de’it katak proteze feto no labarik, la haree ba fronteira, la haree ba relijiaun, la haree ba mai husi nasaun ne’ebé, maibé haree liubá umanidade.
Jornalista: Tome da Silva