Alkatiri Konsidera Desizaun STJ La Estradita Fujitivu Teves Jr Kumpri Lei Internasionál no Konstituisaun RDTL

Hatutan.com, (29 Marsu 2025), Díli-Eis Primeiru-Ministru Marí Alkatiri konsidera desizaun Supremu Tribunál Justisa (STJ) ne’ebé deside la halo extradisaun bá Fujitivu Polísia Kriminál Internasionál (INTERPOL), Arnolfo Teves Teves Jr kumpri Lei internasionál no Konstituisaun RDTL.

Lee Mós: STJ Deside La Halo Estradisaun, Fujitivu INTERPOL Teves Jr Agradese Bá Governu Timor-Leste

Eis Primeiru-Ministru Marí Alkatiri. Foto/Zita Menezes

“Ha’u dehan desizaun tribunál labele iha desizaun seluk ida-ne’e loos tanba lei internasionál no  ita-nia kontituisaun dehan rasik katák ema ida  mai husu apoiu bá ita. Sé ita haruka nian fila bá rai seluk iha ne’ebá nia bele hetan peña morte, ita-nia kontituisaun dehan laiha peña morte ita labele halo ida-ne’e,” Marí Alkatiri hateten bá jornalista sira iha Komité Sentrál Fretilin (CCF), Sesta (28/03/2025).

Mari Alkatiri afirma lei Internasionál rasik mós hateten  ida-ne’e depois liuliu laiha akordu extradisaun entre Timor-Leste ho Filipina. Tanba ne’e, Alkatiri sujere  la bele fó sala bá tribunál ne’e kumpri bá lei internasionál internasionál no ita nian kontituisaun RDTL.

“Agora ita dehan lori ema aat sira mai hotu ita-nia rai, ita hakarak sai estadu ka lakohi sai estadu. Sé hakarak sai estadu ita tenke kumpri ho lei no kumpri ho konstituisaun. Ema mai ona hetan susar iha nia rai, nia halo sala ka la halo sala ne’e buat seluk tenke halo julgamentu bá ida-ne’e agora kaer nia atu lori bá labele tanba iha ne’ebá  (Filipina) peña morte,”Mari Alkatiri tenik.

Jornalista Estajiária: Zita Menezes