Komisáriu Jerál Polísia Henrique da Costa Kumprimenta Komunidade Musulmanu

Hatutan.com, (03 Abril 2025), Díli – Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, Kuarta (03/04/2025), hakat ba kumprimenta komunidade musulmanu iha Meskita Anu-nur, Kampu Alor, Díli.

Lee Mós: Eid al-Fitr Hanesan “Loron Vitória” Ba Musulmanu sira

Komandante Jerál PNTL, Komisáriu Jerál Polísia Hendrique da Costa vizita komunidade musulmanu iha Meskita An-nur, Díli, Kinta (03/04/2025). Foto/Lzaro Pereira Quefi

Komisáriu Jerál Polísia Henrique da Costa  hateten nu’udár  autoridade seguransa tenke tau-matan no harii komunikasaun di’ak ho ema hotu, la haree  ba koori, estatutu sosiál no la haree mós ba relijiaun hodi kontribui ba pás no estabilidade iha Timor-Leste.

“Iha momentu ida ne’e mai kumprimenta Komunidade Musulmanu iha ne’e la’ós ba hotu-hotu maibé ho estrutura sira. Ida ne’e la’ós buat foun maibé iha tinan kotuk mós hala’o vizita hanesan ne’e,” Komisáriu Jerál Polísia Henrique da Costa hateten.

Iha vizita ne’e mós Komisáriu Jerál Polísia Henrique da Costa hameno hela programa balu polísia nian ne’ebé iha tempu badak ekipa Polísia Komunitáriu, Polísia Tránzitu no Investigasaun, sei mai hasoru malu ho estudante eskola An-nur ba  programa polísia vizita eskola nian.

PNTL husu ba komunidade Musulmanu atu nafatin halo komunikasaun ho parte seguransa no karik iha asuntu ruma kona-bá seguransa nian bele kontaktu ba PNTL hodi atende.

Iha fatin hanesan Prezidente Konsellu Kuradór Fundasaun Masjid An-nur, Abdullah Said Sagran hato’o agradesimentu boot ba Komandante Jerál PNTL tanba vizita ida ne’e hatudu katak PNTL iha atensaun ba komunidade musulmanu iha Timor-Leste.

Konsellu Kuradór Fundasaun Masjid An-nur Abdullah Said Sagran informa ba PNTL katak komunidade musulmanu halo jejún durante loron 30 entaun ida ne’e momentu ida atu hasae fé hodi halo mudansa espirituál.

Jornalista Estajiáriu: Lazaro Pereira Quefi