Notariadu Husu Timoroan iha Diaspora Hato’o Pedidu Bá Adidu no Embaxada sira Kona-bá Renovasaun Dokumentu

Hatutan.com, (07 Abríl 2025), Díli – Haree ba distánsia atu fasilita prosesu renovasaun pasaporte no dokumentu sira seluk, Diretór Jerál Servisu Notariadu,  Agostinho Gonçalves Vieira, husu ba timoroan sira (estudante ho traballadór) iha diaspora ka estranjeiru atu hato’o sira-nia pedidu ba adidu no mós embaixadór sira iha nasaun ne’ebe mak hela bá.

Diretór Jerál Servisu Notariadu, Agostinho Gonçalves Vieira. Foto/Lazaro Pereira Quefi

Mekanizmu ne’ebe mak Servisu Rejistu Notariadu hamutuk ho Ministériu Negósiu Estranjeiru no Kooperasaun (MNEK) ho Ministériu Edukasaun (ME), Sekretáriu Estadu Formasaun Profisionál no Empregu (SEFOPE) no Ministériu relevante sira seluk husu ba adidu no embaixadór hotu iha estranjeiru atu identifika estudante na’in hira no sidadaun Timoroan sira ne’ebe mak ba iha nasaun sira besik, zemplu iha Korea du Sul SEFOPE identifika katak traballadór nain hira mak iha ne’ebá identifika hotu depois halo planu atu nune’e tékniku sira bele dezloka ba hodi halo prosesu renova sira nia dokumentu sira no hasai foto ba sira.

“Ha’u husu ba estudante sira no Timoroan hotu-hotu ne’ebé mak namkari iha estranjeiru ba imi nia ejijénsia tenke hato’o ba adidu sira no embaixadór iha rai ne’ebe mak imi hela ba atu sira halo identifikasaun ba ita-boot sira depois sira bele halo fila fali koordenasaun mai Notariadu atu bele prepara tékniku sira bele dezloka ba halo prosesu ba renovasaun pasaporte inklui dokumentu sira seluk,” Agostinho Goncalves Vieira hateten ba jornalista sira iha nia servisu fatin, Díli, Segunda (07/04/2025).

Antes ne’e ekipa tékniku sira ba to’o ona Kambodia, Korea du Sul, agora atu ba tan Austrália, Portugál no mós nasaun sira seluk tan, maibé tanba adidu iha hotu ona entaun husu nafatin ba adidu no embaixadór sira iha estranjeiru atu identifika no foti dadus, atu nune’e, tékniku sira ba hala’o sira nia papél servisu.

Nia esplika, la’ós ba bolseiru de’it ka estudante sira ne’ebé mak ba ho privadu nian, maibé ba Timoroan hotu ne’ebe mak iha estranjeiru hosi Notariadu fasilita naran katak hosi ME, MNEK, SEFOPE no parte relevante sira seluk identifika hotu ona.

Jornalista Estajiáriu : Lazaro Pereira Quefi