Presiza Kontrolu Loja Xinés Sira Ne’ebé So’e Lixu Arbiru

Hatutan.com, (07 Abríl 2025), Díli–Reprezentante povu iha Parlamentu Nasionál husu Governu presiza halo  kontrolu bá negosiante sira liuliu mós bá loja Xinés sira ne’ebé mak so’e lixu arbiru.

Lee Mós: Governu Seidauk Másimu Halo Jestaun Lixu iha Sidade Díli

Lixu butuk iha sidade Díli. Foto/dok.Tome da Silva

Membru Parlamentu Nasionál (PN) husi Bankada PLP, Abel Martins hateten  kona-bá lixu ne’e sé bele karik Ministériu Administrasaun Estatál (MAE), halo oráriu di’ak ida fó bá munisípiu sira atu bele fó orientasaun bá Xefe suku no Xefe Aldeia sira atu halo sosializasaun di’ak ida bá komunidade sira para soe lixu tuir nian fatin ne’ebé prepara ona.

“Ita nian Governu presiza foti medida  sansaun ida bá ita nia negosiante sira, liuliu mak loja Xinés sira ne’e sé bele karik sira mós ajuda, sira nia lixu ne’e labele bá butuk hamutuk iha fatin sentru lixu nian. Sé bele karik sira tula direita sira nian lixu sira ne’e bá iha fatin lixeira Tibar nian, tanba sira mak kadavés so’e lixu arbiru iha sira nian loja oin, nune’e asu no busa dada bá to’o iha estrada boot sira ne’e,”H Deputadu Abel Martins hateten.

Reprezentante povu ne’e afirma negosiante iha loja Xinés sira ne’e so’e lixu arbiru tanba Governu  falta kontrolu bá situasaun sira ne’e.

Iha sorin seluk Deputadu Bankada CNRT, Marcos Xavier hato’o mós preokupasaun katak lixu iha sidade Díli ne’e barak demais, liuliu iha Aimutin ne’e komunidade sira so’e lixu arbiru de’it, iha mós fatin turizmu iha área Branka mós  haree lixu plástiku no aquá mamuk sira ne’e so’e arbiru de’it.

“Husu mós kompañia sira ne’ebé ra’ut lixu ne’e bele pro-ativu ra’ut lixu sira ne’e loron ida ra’ut dala-tolu atu nune’e lixu bele kontrolu ho di’ak,” Nia hateten.

Iha fatin hanesan Vise-Ministru Asuntu Parlamentár Adérito Hugo da Costa haktuir nian parte sei envia asuntu ne’e bá Ministériu relevante atu bele tau matan bá problema lixu iha sidade Díli.

Jornalista Estajiária : Zita Menezes